Копію гістарычнай Каложскай царквы будуюць у Гродне

14.05.2023 Гісторыя

Новы храм паўторыць не сучасны выгляд Каложы, царква мусіць паўтарыць яе выгляд у ХІІ стагоддзі. Адна са сцен храма абрынулася ў ХІХ стагоддзі і была заменена драўлянай. Пра стварэнне копіі царквы паведаміў Sputnik.


50495691821_673cfb3e4a_b.jpg

У падмурак сцен заклалі памятную капсулу і асвяцілі пачатак будаўніцтва храма, які названы ў гонар князя Аляксандра Неўскага. Цікава, што гэтая гістарычная пярсона не мае сувязі з горадам над Нёманам.

Будаўнічыя работы па ўзвядзенні другой Каложы пачаліся некалькі месяцаў таму ў мікрараёне Вішнявец на скрыжаванні Індурскай шашы і вуліцы Малахавіцкай. Увесну скончылі заліваць падмурак і пачалі ўзводзіць сцены храма.

Як будзе выглядаць новы храм?

Новы храм стане рэплікай першапачатковага выгляду Каложскай царквы і пакажа, як яна магла выглядаць адразу пасля будаўніцтва ў канцы XII стагоддзя. Ён спраектаваны ў стылістыцы старажытнарускага дойлідства з арыентацыяй на візантыйскую і раманскую архітэктуру. Менавіта Каложская царква ў Гродне стала адным з стылістычных прататыпаў гэтага праекта.

Паводле інфармацыі распрацоўшчыкаў, сцены «другой Каложы» будуць выкананы з цэглы, аздобленага звонку плінфай альбо клінкернай пліткай, якая імітуе плінфу. Фасады будуць упрыгожаны характэрнымі для Каложскай царквы ўстаўкамі з паліраваных каляровых валуноў і паліванай керамічнай пліткай — маёлікай з арнаментам у выглядзе крыжоў. Шклопакеты з вонкавага боку закрыюць традыцыйнымі каменнымі накладкамі са светлавымі праёмамі ў выглядзе дэкаратыўных колаў і дробных трыкутнікаў.

Гродзенцы неадназначна ўспрынялі гэтую ідэю.

Чым унікальная Каложская царква?

Глядзіце яшчэ: Каложская царква - перліна Гродна. Гісторыя за 5 хвілін

Каложская царква ў Гродне была пабудавана ў канцы XII стагоддзя. Мур сцен выканана з валуноў і плінфы (абпаленай глінянай цэглы), у іх умураваны гліняныя збаны-галаснікі, якія паляпшаюць акустыку. У сярэдзіне і канцы XIX стагоддзя частка заходняй і ўся паўднёвая сцены разбурыліся. Каменную сцяну замянілі на драўляную, якая праслужыла больш за стагоддзе.

АМ, budzma.org