Вольныя «Купалаўцы» завяршаюць год прэм’ерай паводле рамана «Сфагнум» Віктара Марціновіча. Паўнафарматны спектакль будзе пятай за 2022 год жывой прэм’ерай «Купалаўцаў» на тэатральнай сцэне і анлайн.
Пастанову можна будзе пабачыць ужывую 22 снежня ў Варшаве на сцэне «Перадавік» Драматычнага Тэатра (Teatr Dramatyczny) па адрасе ul. Olesińska, 21.
Анлайн спектакль будзе дасяжны на YouTube-канале «Купалаўцы» ў дзень прэм’еры а 21.00 па Мінску. Доступ вольны, але данаты вітаюцца.
«Сфагнум» — гэта сума назіранняў за тым, як дзіўна ўсё ўладкавана ў сучаснай Беларусі, сфармуляваная ў не зусім цэнзурнай форме. Гэта не спектакль пра вёску. Гэта не спектакль пра балота. Гэта спектакль пра абсурд, у які пагрузілася Беларусь.
Што значыць сфагнум? Сфагнум — гэта балотная расліна, тарфяны мох. Як кажа адзін з герояў п’есы: «Тут з яго ўсё, паглядзіце пад ногі: купіны — жывы сфагнум, торф — перагнілы сфагнум. Партызаны сухі сфагнум бралі замест бінтоў і ваты. А людзі мясцовыя, калі хаты будуюць, сфагнум між бярвення кладуць, каб цёпла было. А яшчэ ён гарыць добра. Сфагнум — лекі, сфагнум — паветра, сфагнум — агонь, сфагнум — вада, сфагнум — зямля пад нагамі. Уся краіна — сфагнум».
А што адбываецца на гэтым балоце? Трое маладых людзей, можна сказаць, «злачынцаў-пачаткоўцаў», правальваюць першую сур’ёзную справу, даручаную ім бандай. Яны губляюць грошы і вырашаюць схавацца ў аддаленай беларускай вёсачцы. Аднак вёска не такая простая, і тут жывуць зусім не такія простыя людзі...
Аўтар перакладу рамана на беларускую — Віталь Рыжкоў.
Рэжысёр, аўтар інсцэніроўкі — Аляксандр Гарцуеў
Ролі выконваюць: Сяргей Чуб, Мікалай Стонька, Аляксандр Зелянко, Аляксандр Казела, Алег Гарбуз, Міхась Зуй, Зоя Белахвосцік, Аляксандр Гарцуеў, Валянціна Гарцуева, Кацярына Яворская, Ігар Сігоў.
У спектаклі прагучыць музыка Міхала Клеафаса Агінскага, Антоніа Вівальдзі, Жана-Марка Біркгольца, Aляксандра Зелянко, Дзмітрыя Фрыгі.
Спектакль адбудзецца пры падтрымцы Тэатральнага інстытута імя Збігнева Рашэўскага, Драматычнага тэатра Варшавы, фонда «Tutaka», Музея Вольнай Беларусі і фінансаванні Стабілізацыйнага фонду — ініцыятывы па падтрымцы культурніцкіх і адукацыйных арганізацый ва Украіне, Усходняй і Паўднёва-Усходняй Еўропе і Цэнтральнай Азіі, якія пацярпелі ад наступстваў вайны ва Украіне.
Падрабязней аб спектаклі можна даведацца на старонцы «Купалаўцаў», падтрымаць вольную тэатральную групу ў выгнанні можна тут.
