Трыё актораў Купалаўскага тэатру ўзяла ў падмацоўку жывую рытм-сэкцыю, каб стварыць адзін з самых магутных і рамантычных альбомаў гэтага году ў беларускай музыцы.

ili-ili – list, Вігма, 2013

Летась ili-ili паказалі, на што яны здольныя, калі запісалі альбом “Post Perfect”. Даволі някволая праца, аднак, развальвалася на кавалкі, бо была пазбаўленая ўцямнай канцэпцыі. У сваім беларускамоўным альбоме музыкі гэтую праблему выправілі – іх новая праграма слухаецца цэльна і гарманічна, кожны трэк нібы перараджаецца ў наступны.

Адметнасьць ili-ili ў тым, што яны ня маюць асноўнага харызматычнага вакаліста, партыі разьмеркаваныя паміж Есяневічам, Зуем і Яскевічам, і ў кожнага зь іх свая манера выкананьня: Зьміцер – рамантык, ён сьпявае больш далікатна, з разыначкай, Міхась больш па-цоеўску прагаворвае, а Павал выводзіць ад душы – нібы за сьвяточным сталом.

“list” – даволі няпросты для асэнсаваньня альбом, нягледзячы на яго ўяўную лёгкасьць і паветранасьць. Ён поўніцца песьнямі-адкрыцьцямі, бо аніводзін з 11 трэкаў тут не правальваецца. Акрамя паказаных раней практычна бездакорных гітоў “Танчыць” і “Сэрцы” найперш вылучаюцца “Будзе як будзе”, “Шлях”, “Мядзьведзіца”, запісаная ў дуэце з Настай Шпакоўскай. Кожнаму трэку – ды шчыльную ратацыю на ўсіх тэле- і радыёканалах краіны, і ўвасабляць тады гэтаму гурту нармальны такі беларускі мэйнстрым.

ili-ili яўна намацалі свой стыль і гучаньне. Надалей варта толькі ўдасканальвацца.

Ідэя: 9
Выкананьне: 8
Тэксты: 9
Запіс: 8
Аздабленьне: 9

Сяргей Будкін