31 сакавіка ў гімназію № 14 завітаў лялечны тэатрык “Лямцавая батлейка” з новым спектаклем “Мама Му ў басейне” паводле кнігі шведскай пісьменніцы Юі Вісландэр. Паглядзець спектаклік прыйшлі вучні другіх і чацьвертых класаў – больш за 100 чалавек! Спачатку дзеці сядзелі на сваіх месцах, але ўжо праз некалькі хвілін самыя цікаўныя апынуліся на падлозе перад сталом-сцэнай.

Сустрэча пачалася з падарункаў. Загадчыцы бібліятэкі былі ўручаныя кніжкі на беларускай мове ад кампаніі “Будзьма беларусамі!”, у межах якой адбывалася сустрэча. А яшчэ бібліятэкаркі атрымалі закладачкі для кніг з інфармацыяй пра вядомых беларускіх пісьменнікаў і паэтаў. Дзеткам патлумачылі, што гэтыя закладачкі будуць давацца тым, хто возьме пачытаць кніжку на роднай мове.

Выдавецтва “Мастацкая літаратура” дапамагло арганізаваць выступ, а дзеткі падчас моўнай віктарыны атрымалі ў якасці прызоў расклад заняткаў, з рэкламай кніжкі “Мама Му, Крумкач і каляды”.

Было весела, хоць і шумна! Дзеці і дарослыя навучыліся рабіць размінку і заўзець правільна :). Пасля сустрэчы вучні пабеглі ў бібліятэку за кніжкамі пра Маму Му, якія, са слоў саміх бібліятэкарак, рэдка стаяць на паліцах.

Да пабачэння! Да новых сустрэч! Чытайце болей! Чытайце кніжкі на роднай мове!

Калі Вы жадаеце, каб вясёлая Мама Му ў выкананні “Лямцавай батлейкі” прыехала да вас у вашую школу ці бібліятэку і арганізавала сапраўднае шоў для дзетак альбо дарослых, пішыце на скрыню razam@budzma.org, і ваш зварот не застанецца без увагі.

Спектакль “Мама Му” ўжо прайшоў з посьпехам у розных гарадах і рэгіёнах Беларусі (Мінск, Брэст, Віцебск, Гродна, Дзяржынск, Слуцк, Заслаўе, Ждановічы, Мар’іна Горка). А патэнцыйным арганізатарам паведамляем, што пастанова разлічана на школьнікаў малодшага ўзросту.

Коратка пра аўтарку. Юя Вісландэр (Jujja Vislander) – шведская дзіцячая пісьменніца (нарадзілася ў 1944г.), вядомая сваімі вясёлымі гісторыямі аб цудоўнай і адважнай гарэзе – карове Му, яе сябру-хвальку крумкачы Краксе, ды іх сумесных прыгодах. У 2005 г. творчы дуэт Юі і Тумаса Вісландэраў быў угараваны прэміяй імя Астрыд Ліндгрэн.