Беларуская паэтка Марыйка Мартысевіч выклала ў сваім фэйсбуку новы верш.
Ведаеце, я ведаю нуль вайскоўцаў,
што ўзялі й пачалі вайну.
Войны пачынаюць палітыкі,
каб праветрыць вайскоўцаў,
ініцыяваць ратацыю асабовага складу,
абнавіць флот, авіяцыю, бронетэхніку.
Войны пачынаюць гісторыкі,
каб праверыць, як працуюць у новых умовах законы гісторыі:
ці ўсё гэтак жа гараць арсеналы,
лютуе чума,
уцякаюць уцекачы,
марадэрствуюць марадэры,
ці ўсё гэтак жа прапаганда ператварае людзей у андроіды.
Прамыслоўцы — гэтыя заўсёды падносяць патроны,
падвозяць бінты,
пастаўляюць хлеб і тушонку,
наліваюць гарэлку, бензін,
прапануюць адгазнікі.
І толькі мэдыкі не пачалі ніводнай вайны,
бо гэта праз іх бяссонныя ночы
праходзяць вайскоўцы з адарванымі канцавінамі
і паэты з расколатымі сэрцамі.
