Алесь Тодараў разбіраўся на budzma.org, што такое ўменне жыць і для чаго варта кантраляваць свое думкі і эмоцыі.
Уменне жыць — гэта найперш уменне кіраваць сабой: сваім эмацыйным станам, паводзінамі, настроем. Гэта здольнасць разумець сябе, свае жаданні, мэты, інтарэсы. Уменне бачыць і карэктаваць сцэнары і шаблоны, па якіх жывеш і дзейнічаеш. Гэта здольнасць адказваць за сябе і бачыць магчымыя наступствы тых ці іншых крокаў і ўчынкаў, пазбягаючы тым самым магчымых непрыемнасцяў, праблем і памылак.
На жаль гэтым простым, але разам з тым эфектыўным навыкам і ўменням не вучаць у звычайнай школе. Таму ў дарослым жыцці мы вельмі часта аказваемся бездапаможнымі, сутыкаючыся са стрэсамі, негатывам, праблемамі, неабходнасцю планаваць і мэтанакіравана дзейнічаць. Нам перашкаджаюць няўпэўненасць, зашоранасць мыслення, няўменне кіраваць сваім станам, адсутнасць дакладных арыенціраў і патрэбных кампетэнцый.
Добрая навіна складаецца ў тым, што ніколі не позна засвоіць усё неабходнае ў дастаткова кароткія тэрміны. Самае галоўнае ў першую чаргу — задумацца над тым, чаму ўсё адбываецца менавіта так, а не іначай.
Жыццё без мэты
Калі вы насамрэч кантралюеце свой розум, вы кантралюеце і сваё жыццё. Па вялікім рахунку гэта асноўная думка любой калі-небудзь напісанай кнігі аб дасягненні поспеху. Памятаць гэтую простую ісціну і прытрымлівацца яе — задача не з лёгкіх, бо наш розум парою, нібы капрызнае дзіця, якое ненавідзіць дысцыпліну.
Першае, з чаго варта пачаць, — узяць верх над сваімі думкамі, пакінуць толькі самае рацыянальнае і выканальнае. Бо думаць — яшчэ не значыць рабіць. Бяздзейнічаючы, вы нічога не даб’ецеся. Не дайце пустым развагам адвесці сябе ад сапраўднай мэты. Пераключыце ўвагу на думкі, якія падахвочваюць устаць з канапы і пачаць дзейнічаць.
Найбольш рацыянальныя думкі варта фіксаваць. Запісваючы мэту, вы пераносіце яе са сваёй галавы на паперу і пачынаеце выдаткоўваць час і сілы не на абдумванне фармулёвак, а на пошук шляхоў яе ажыццяўлення.
Жыццё без мэты — гэта як падарожжа па дарозе без указальных знакаў. Мэты даюць нам уяўленне, куды рухацца, што неабходна для развіцця, дапамагаюць пераадольваць перашкоды дзеля дасягнення чагосьці важнага.
Для запісаў падыдзе просты нататнік. На адным развароце змяшчаем мэты на бягучы тыдзень, падзяляем іх па катэгорыях і расстаўляем прыярытэты пры дапамозе простых умоўных абазначэнняў.
Адсутнасць плана
Чым больш рашэнняў вы прымаеце, тым больш псіхалагінай энергіі марнуеце. Гэтыя рашэнні могуць быць як значнымі, так і не вельмі. Напрыклад, што апрануць на неабавязковую сустрэчу, вынік якой ніяк не паўплывае на вашае жыццё.
Кожны вечар складайце план на раніцу. Спачатку ўносьце ў яго важныя задачы. Абнаўляйце спіс па меры неабходнасці.
Ігнараванне вэрхалу
Згодна з даследаваннямі, вялікая колькасць глядзельных стымулаў аказвае значны ўплыў на мозг, калі вы спрабуеце засяродзіцца.
Падтрымлівайце парадак, прычым не толькі на працоўным месцы, але і ўсюды, дзе гэта магчыма. Гэта павялічвае канцэнтрацыю і проста супакойвае.
Перфекцыянізм
Імкненне да ідэальнага выніку — добра, але ў меру. Спрабуючы выканаць задачу на 10 з 10, можна выдаткаваць шмат часу, але вашыя празмерныя намаганні могуць увогуле не заўважыць. Спытайце сябе, ці задаволены вы вынікам працы. Не марнуйце тоны сваёй энергіі на дасягненне ідэальнага выніку. Проста зрабіце працу добра.
Што рабіць, калі вашыя планы раптам абрынуліся? 5 карысных парадаў
1. Падумайце, чаму менавіта гэтая рэч ці падзея важная.
Паглядзіце на жыццё з другога боку. Магчыма, і шкадаваць няма аб чым? Можа быць, добра паразважаўшы, прыйдзеце да высновы, што проста жылі ва ўладзе стэрэатыпаў.
2. Знайдзіце сабе іншы занятак.
Калі Вы расчараваныя, гэта не лепшы час для новых планаў. Таму кіруйцеся спантаннымі рашэннямі.
3. Вучыцеся шанаваць кожнае імгненне свайго жыцця.
Незбыўныя планы — гэта чарговая нагода задумацца аб тым, што нават калі ўсё ідэальна, усё можа абрынуцца ў самы непадыходзячы момант. Трэба імкнуцца цаніць кожнае імгненне свайго жыцця.
4. Не шукайце вінаватых, не вінавацьце сябе, а паспрабуйце адпусціць сітуацыю.
Далей вы будзеце разумнейшым: пастарайцеся не працаваць на знос і сачыць за здароўем, больш уважліва ставіцца да людзей.
5. Кожнае расчараванне, якое нам выпадае, — нагода ісці далей з новымі сіламі і новымі ведамі!
Алесь Тодараў, budzma.org
