Свінка Пэпа (Вялікабрытанія)
Не, гэта не жарт! Нягледзячы на статус папулярнага мема, гэты мультсерыял сапраўды працуе на сваю аўдыторыю — маленькіх дзяцей і іх бацькоў. Чаму? Па-першае, кароткія выпускі, каб дзеці не стамляліся. Па-другое, прыгоды Пэпы і яе сям’і вучаць знаходзіць выйсце з любой сітуацыі. І па-трэцяе, набліжаныя да рэчаіснасці характары персанажаў паказваюць, што ў свеце няма ідэальных дзяцей і людзей у прынцыпе. Дык хіба гэта дрэнна?
У дадатак мульт пакажа прыклад самакантролю (Пэпа нядрэнна трымае сябе ў руках) ды навучыць паважаць бацькоў. Тут няма негатыўных сітуацый, але не таму, што мульт адрывае ад рэчаіснасці. Ён хутчэй паказвае, што без іх ўвогуле можна абысціся, нават калі не ўсё ідэальна. Ну а каб бацькі не сумавалі, у мульце сустракаецца вытрыманы дарослы гумар.
Вядома, Пэпа не без мінусаў, але гэта сапраўды добры варыянт для сямейнага прагляду.
Ох ужо гэтыя дзеткі!
Часам новае — гэта добра забытае старое. Тое ж тычыцца і гэтага папулярнага мультсерыяла 90-х і нулявых. Мульт распавядае пра прыгоды пяці галоўных герояў: Томі, Чакі, Філ, Ліл і Анжэлікі. Сюжэт грунтуецца на звычайных побытавых сітуацыях, якія, дзякуючы дзіцячаму ўспрыманню хутка становяцца сапраўднымі падарожжамі! Пры гэтым бацькі бачацца поўнай супрацьлегласцю — крыху адасобленымі, дзівакаватымі асобамі. Не згодныя з такой падачай? Але ж менавіта такімі вы можаце падавацца дзіцяці.
Калі казаць пра герояў, то ў кожнага свае станоўчыя і адмоўныя бакі, што на кантрасце паказвае, як лепш сябе паводзіць, а што прывядзе да канфліктаў і нават бяды. Паміж дзецьмі далёка не ідэальныя адносіны, таму праблема камунікацыі тут якасна ўздымаецца, што можа навучыць дзяцей шукаць кампрамісы. Ну і самае галоўнае для такога мульсерыяла — эпізоды не толькі цікавыя, але і маюць маральныя урокі.
Менавіта таму раім гэты мультфільм як дзецям, так і дарослым, якія ў сваім дзяцінстве яго глядзелі. Цікава ж часам зірнуць, наколькі змянілася ўспрыняцце праз гады. І, дарэчы, студыя ўжо анансавала перазапуск, таму ў хуткім часе чакаем працягу!
Дзеткі з класа 402
Але што мы ўсё пра маленькіх дзяцей — яны ж хутка вырастуць, пойдуць у школу... І вось тут можа быць дарэчы мультсерыял “Дзеткі з класа 402”. Серыі тут якраз будуюцца на асаблівасцях дзіцячай псіхалогіі, канфліктах поглядаў дарослых і дзяцей школьнага ўзросту. А што можа быць больш наглядным для такога ўзросту, як не блізкія да рэчаіснасці партрэты персанажаў! Паглядзіце самі: эгаістычная лідарка класу Нэнсі, надакучлівая выдатніца Полі, лайдак Джэсі і не надта сумленны дэндзі Артур — ці не знаёмыя апісанні? Бадай, у кожнага ў класе былі падобныя.
Сам жа сюжэт пастаянна сутыкае герояў з даволі тыповымі знешнімі і ўнутранымі дылемамі. І зноўку ж — няма падзелу на чорнае і белае, што дапаможа сфармаваць шматграннасць учынкаў і разуменне неадназначнасці нашага свету. Урэшце, кожны эпізод заканчваецца маральным урокам і паказвае вынік розных сітуацый... Добрая магчымасць павучыцца на чужых памылках і паглядзець на свае паводзіны крыху збоку, няхай і перабольшана.
У мульціку хапае тонкага гумару і цікавых паваротаў, таму глядзець будзе нясумна!
Апалон: дзеці на ўзгорку
Калі пра сюжэт без спойлераў, то гэта гісторыя сяброўства вучняў старэйшай школы. Адзін з галоўных герояў — Каору Нісімі, чарговы раз у новай школе. Так склаўся лёс, што ад моцнага хвалявання яго ванітуе, кружыцца галава, пэўны час ён нават рухацца не можа. І вядома, што праз гэта ў яго часцяком праблемы з аднакласнікамі. У жорсткім падлеткавым соцыуме такія асаблівасці — вялікі паказчык слабасці, што дае нагоду астатнім з такога здзекавацца. І вось у Каору новая спроба. На жаль, і тут большасць класа яго адразу абазвала “батанікам”. Але ж... не бывае дрэннага без добрага. І дадзеная гісторыя — не выключэнне. Калі вырашыце паглядзець, то вас чакае скачок у аповед пра жыццё, сапраўднае сяброўства і пераадоленне канфліктаў, унутраных і знешніх праблем падлеткаў на мяжы дарослага жыцця. Анімэ багата прыпраўленае вельмі якасным і добрым джазам і візуальным стылем, поўны камплект для прагляду тут у наяўнасці!
Раім вучням сярэдняй і старэйшых класаў, а таксама тым, хто хоча заглыбіцца ў такую жыццёвую, але прыгожую і добрую гісторыю.
Канікулы Гуфі
Заканчваем нашу падборку поўнаметражных мультфільмам ад Disney. І не варта зважаць на яшчэ аналагавую малёўку і даволі вялікі ўзрост — падлеткавым гісторыям і пытанню бацькаў і сыноў нашмат больш часу!
Гісторыя апавядае пра сына Гуфі Макса. Так ужо склалася, што хлапец пакахаў дзяўчыну і ўвесь гэты час не мог ёй прызнацца. Ды і занадта крутым у школьнай іерархіі яго, мякка кажучы, не назавеш. І вось апошнія дні перад канікуламі, і наш герой вырашыў усё змяніць. Так бы мовіць, і цмока заваліць, і прынцэсу вызваліць. Але ж... усё ідзе не зусім па плане. І ў самы адказны момант у жыцці Макса ён аказваецца з бацькам у машыне ў падарожжы на рыбалку праз усе Штаты. Так ужо склалася, што бацька з сынам абсалютна адзін аднаго не разумеюць, нібыта гавораць на розных мовах, праз што ў іх бываюць непаразуменні, канфлікты, а самае галоўнае — яны даволі далёкія адзін аднаму. Ці дапаможа ім гэтае падарожжа? Ці здолее Макс стрымаць абяцанне? Як збоку выглядае канфлікт бацькаў і сыноў? Пра ўсё гэта можна пабачыць якраз у гэтым мультфільме, а самае галоўнае — ён сапраўды можа дапамагчы зрабіць для сябе пэўныя высновы. І можа... Пабачыць прыгожую рамантычную лінію? Але каб пра гэта даведацца, паглядзіце мульт!
Бацькам і дзецям абавязкова для азнаямлення, нягледзячы на ўзрост гэтай стужкі!
Лаймуціс Сакалоў
