У першы дзень каляндарнай зімы саграваемся цёплымі трэкамі беларускіх музыкаў. На наш сціплы погляд, лістапад па канцэнтрацыі асобных рэлізаў, выйшаў мацнейшы, чым той жа кастрычнік. Тут сапраўды ёсць, з чаго абіраць: ад пост-панка і індзі-попа да музыкі ў стылі 70-х і рэпа з элементамі бразільскага фонка. Давайце крыху бліжэй разгледзім кожны з 10 рэлізаў, бо пра іх без сумневу ёсць, што сказаць.
Nevika — Закахалася
Новая песня Вікі — абсалютны выбар яе слухачоў, якія галасавалі за рэліз менавіта гэтага трэку на прамым эфіры ў цік-току, дзе артыстка вырашыла паказаць некалькі сваіх дэма-запісаў. Песня «Закахалася» гучыць адначасова пяшчотна і сэксуальна і адкрывае новыя грані ў творчасці спявачкі. Акцэнт робіцца на гітарны інструментал, які поўнасцю раскрываецца бліжэй да прыпеву і дазваляе па-сапраўднаму закахацца ў гэты трэк.
NAVIBAND — Лістапад
Хто яшчэ з беларускіх музыкаў умее пісаць такія кранальныя песні-калыханкі? Лічаныя асобы! Вось і песня «Лістапад» ад калектыву NaviBand мякка кранае за плечы і абдымае, як матуля, што заўсёды суцешыць і падтрымае. Кампазіцыя стварае тое самае адчуванне дому, якое шмат каму з нас цяпер так патрэбна.
Chabor — Dah
Серабранскі рамантык, вакаліст і франтмэн гурта Chabor Алесь працягвае плавіць сэрца дзяўчынак, як ліпеньскае сонца пламбір. І робіць ён гэта ў новай лірычнай кампазіцыі «Dah», напоўненай яркімі меланхалічнымі вобразамі.
Трэба сказаць, што гэтая песня ўвогуле не падобная на той пост-панкавы кірунак, па якім упэўнена рушыў гурт у папярэдніх рэлізах і, хто ведае, куды далей можа занесці прага да эксперыментаў. Упэўнены, што без крутой музыкі мы дакладна не застанёмся.
Nastka — Тайны больш няма
Файна, калі маладыя беларускія выканаўцы выпускаюць свае першыя трэкі па-беларуску. Яшчэ круцей, калі гэта эксперыментальны жаночы індзі-поп, вакал у якім гучыць, нібы голас анёлаў з нябёсаў. Насця ўклала ў свой трэк як танцавальныя, так лірычныя элементы адначасова і атрымалася кампазіцыя, якую з гонарам можна паказаць любому замежніку ў адказ на пытанне: «А як гучыць ваша сучасная музыка на вашай мове?».
SONCAU — Твайго сэрца блакіт
Выпадкова пачуўшы кавалак гэтай песні ў ціктоку, я ўсё чакаў яе рэлізу. І вось, у лістападзе, яна выйшла і трапіла ў самае сэрца, апраўдаўшы самыя смелыя чаканні. Вакал Дзімы стварае неверагодную гармонію спачатку з фартэпіяннай партыяй, а потым, з астатнім міксам з інструментаў, якія цудоўна раскрываюцца ў прыпеве. Калі і ёсць ідэальная рамантычная песня для пачатку гэтай зімы, то гэта, безумоўна, «Твайго сэрца блакіт».
bayski — Сны
Як мог бы гучаць сон, калі быў бы песняй? Меланхалічнай гітарнай партыяй, з нарастаючым басам, прадуманым тэкстам і абавязкова — заядаючым прыпевам. Менавіта такой і выйшла песня «Сны», дзе лірычны герой то ўпадае ў бессань, то ўпіваецца ўспамінамі, эпізадычна з’яўляючыся ў снах сваёй былой дзяўчыны. Яшчэ адна шыкоўная балада пра каханне ў скарбонку маладых беларускіх артыстаў новай хвалі.
NOCHY — Поле бою
Жыццесцвярджальна, танцавальна, жыццёва — тры словы, якімі можна апісаць новы сінгл гурта Nochy. Выбух эмоцый і кантраст паміж куплетам і прыпевам, на якім выдатна грае вакалістка гурта. Але не спяшайцеся расслабляцца, бо тэкст у гэтай песні — не проста дэкор, а важны элемент. Толькі паглыбіўшыся ў яго можна разгадаць сапраўдны сэнс песні і як след яе адчуць.
Sw@da, Niczos — Lusterka
Артысты з Падляшша не плануюць спыняцца напрыканцы гэтага года і, мяркуючы па іх бурлівай дзейнасці, у наступным таксама. Літаральна ўчора яны выкацілі слухачам альбом #INDAWOODS — зборнік з 11 трэкаў, аб’яднаных адной ідэяй, абсалютная большасць якіх ужо выходзіла калісьці сінгламі. Трэк «Lusterka» — не з’яўляецца нейкім адметным, ён проста атрымаўся камбінацыяй розных музычных трэндаў. Мяркуйце самі: бразільскі фонк, сталёвая рэп-чытка і меладычны вакал у куплеце — хіба не падобна на трэндавае гучанне ўсяго, што было ў 2024?
СОЮЗ — Калі ты запытаеш
Адзін з тых самых беларускіх гуртоў, якія не трэба прадстаўляць. І хоць у СОЮЗа рэгалій больш, чым у Брэжнева, гэта не перашкаджае ім здзіўляць слухачоў. Канкрэтна цяпер — першым трэкам па-беларуску ў сваёй творчасці. Ды якім! Мілагучнасць яго перавышае ўсе дапушчальныя нормы, інструментал, відавочна, адсылае да залатых часоў «Песняроў», а вакал настолькі лёгкі, што рызыкуе ўзляцець пад аблокі, як шар з геліем. Кампазіцыя адназначна на 12/10 і я вельмі раю хоць разок націснуць на плэй і даць сваім вушам адчуць гэтую асалоду.
da kostka, Lastouski — Вішнёвая костка
«Вішнёвая костка» — музычная сінергія Ластоўскага і паэткі Дар’і Бялькевіч. Ад гэтай кампазіцыі вее вайбам сталічных трамваяў, юнацкімі марамі, абдымкамі на развітанне і п’янымі размовамі на кухні а 4-й ранку. Можна сказаць, што калабарацыя музыканта і паэткі атрымалася цалкам удалая і асабіста я разлічваю на працяг, які, пэўне ж, будзе яшчэ больш кранальным, што па тэксту, што па музыцы.
Хатні Томпсан, Budzma.org
