Смачны сняданак для ўсёй сям’і — наліснікі з тварагом. Гатуем з «Будзьма»

Напэўна, не раз вы елі бліны з маслам, смятанаю, мачанкаю, але ці ведалі, што іх можна падаваць у іншай форме? З начыненнем і падпечанымі ў духоўцы. Такія бліны называюць наліснікі. Начыненне можа быць абсалютна рознае — ад рыбнага, мяснога ці грыбнога фаршу да садавіны і сочыва. Сёння прыгатуем смачны сняданак або дэсерт і начынім бліны тварагом.

Страва з ХІХ стагоддзя

Бліны ў нашых продкаў заўсёды асацыяваліся з аграрным календаром. Часта іх падавалі на святы, гатавалі іх не толькі з пшанічнай мукі, такі спосаб з’явіўся значна пазней. Спачатку бліны былі грубыя, іх гатавалі з грачанікавай або жытняй мукі, з пшанічнай мукі бліны былі тоўстыя і падобныя да хлеба.

Танюсенькія бліны, у якія можна было заварочваць начыненне з’явіліся толькі ў ХІХ стагоддзі пад заходнім уплывам і сталі традыцыйнай стравай для беларусаў і ўкраінцаў. Прычынай з’яўлення наліснікаў сталі печкі-пліты «англічанкі» з больш-менш стабільным жарам, якія тады пачалі з’яўляцца ў гаспадарцы. Гэта дало магчымасць смажыць хутчэй і прасцей. Тонкі і эластычны блін стаў добрай абалонкай для пэўнага начынення. Сапраўднымі наліснікамі лічацца бліны з творагам, прыпечаныя ў печы.

Як прыгатаваць наліснікі з начыненнем?

Для цеста спатрэбяцца яйкі, соль, цукар, трохі малака, мука. Прадукты трэба дбайна перамяшаць венчыкам ці відэльцам да аднастайнай масы. Вазьміце спачатку для замешвання толькі частку малака, а потым паступова дадавайце астатняе малако, пастаянна памешваючы цеста. Напрыканцы дадайце алей. Такім чынам прасцей замяшаць цеста без камячкоў. Па гушчыні цеста для бліноў на малацэ павінна атрымацца, як вадкая смятана, але пры гэтым не як вада. Каб паскорыць працэс, можна скарыстацца міксерам ці камбайнам.

У цеста для тонкіх бліноў абавязкова трэба дадаваць алей, тады вашыя бліны не будуць прыліпаць да патэльні і атрымаюцца прыемнага залацістага колеру.

Каалі цеста гатова, добра разагрэйце патэльню і злёгку прамажце яе алеем. Набірайце ў апалонік столькі цеста, каб хапіла пакрыць усю патэльню тонкім слоем. Наліце цеста на патэльню, потым трохі нахіліце і пакруціце яе ў розныя бакі, пакуль цеста не пакрые роўным пластом ўсю плошчу патэльні. На сярэднім агні з аднаго боку блін смажыцца прыкладна паўтары хвіліны, акуратна пераварочваем на другі бок і дасмажваем блін. Лепш выкарыстоўваць максімальна плоскую лапатку, каб блін не парваўся.

Глядзіце яшчэ: Амлет з грыбамі ад каралевы Марысенькі

Пакуль насмажаныя бліны крыху астыгаюць, робім начыненне з тварагу. У тварог дадаць смятаны, можна цукру, ваніліну, цынамону або разынак па смаку. Перамяшаць тварог так, каб атрымалася аднародная тварожная маса. Выкладваем лыжку тварагу на адзін з краеў бліна, бакі падгінаем. Краем, дзе няма тварагу, начыненне прыкрываем і закручваем блін.

Бліны выкласці ў форму, пры жаданні іх можна прысыпаць цукрам і пакласці на іх некалькі кавалкаў масла. Паставіць у духоўку ці печ на 10 хвілін пры тэмпературы ў 150 градусаў.

Падавайце наліснікі з сочывам, смятанай ці мёдам.

Смачна есці!

Нам спатэбіцца:

Калі вам падабаюцца нашыя відэапраекты і аўтарскія артыкулы, вы можаце падтрымаць рэдакцыю «Будзьмы», набыўшы нам кубачак кавы. Гэта дапаможа нам стварыць больш цікавых відэаролікаў і арыгінальных артыкулаў.