Беларуская дызайнерка Наста Васючэнка, заснавальніца брэнда Kanva, апынулася на старонках Vogue Poland, заўважыў CityDog.io. Выданне расказала пра яе стыль, творчасць і новую калекцыю ўпрыгажэнняў.

Пра беларускую дызайнерку Насту Васючэнка распавялі на анлайн-старонках польскага Vogue. У матэрыяле «Miejskie syreny Kanva» («Гарадскія русалкі Kanva») журналісты пішуць пра яе брэнд і ўнікальны падыход да дызайну, дзе традыцыйныя беларускія матывы пераплятаюцца з сучаснымі формамі.

Вокладка матэрыялу. Фота: Vogue.pl.

Часопіс прадставіў новую рэкламную кампанію брэнда Kanva, у якой Наста па-новаму інтэрпрэтуе выяву варшаўскай русалкі, або сірэны, — сімвала горада. Замест звыклага воднага асяроддзя міфічныя гераіні з’яўляюцца ў нечаканых месцах сталіцы: каля будаўнічых лясоў, у пральні, на вулачках Старога горада.

Фота, якія выкарыстоўвалі ў матэрыяле Vogue. Фота: Hanna Shot, Vogue.pl.

У вобразах выкарыстоўвалі ўпрыгожанні з каралаў, жэмчугу, бурштыну і плеценых з саломы ракавін. Так міфічныя выявы злучаюцца з сучаснымі гарадскімі кантэкстамі.

Дарэчы, у здымках для Vogue узялі ўдзел і іншыя беларускі. За фота адказвала Hanna Shot, стылізацыяй займалася Паліна Кавалёва, мадэллю стала Вера Філенка, макіяж зрабіла Воля Вішнеўская, а прычоску — Наста Мацейчык.

Kanva — беларускі брэнд, заснаваны ў Мінску ў 2018 годзе дызайнеркай Настай Васючэнка. Яго фішка — спалучэнне этнічных і сучасных матываў. Сярод самых пазнавальных айтэмаў Kanva: завушніцы з саломы, керамічныя падвескі і аксесуары з элементамі беларускага фальклору.

Апошнія тры гады стваральніца праекта жыве і працуе ў Польшчы.