Беларускі ПЭН абвяшчае збор заявак на новы сезон прэміі імя Францішка Багушэвіча за творы, выдадзеныя і апублікаваныя ў 2024 годзе. Гэта ўзнагарода ўшаноўвае творцаў, якія аднаўляюць гістарычную памяць і спрыяюць умацаванню беларускай ідэнтычнасці. Заяўкі прымаюцца да 19 лютага, піша penbelarus.org.
Сёлета прэмія атрымала моцны штуршок у выглядзе перазагрузкі! Новыя рэдакцыі статута і рэгламенту, сучасны падыход да намінацыі ды шмат яшчэ цікавага.
Чаму гэта важна?
Прэмія імя Францішка Багушэвіча была заснаваная ў 1996 годзе і з таго часу застаецца сімвалам пошуку праўды праз мастацкае слова. Яна ўручаецца за творы, што адлюстроўваюць гісторыю, культуру і духоўную спадчыну Беларусі.
Хто і каго можа намінаваць на прэмію?
Права намінаваць творы, што адпавядаюць мэтам прэміі, маюць толькі сябры Беларускага ПЭНа.
Для ўдзелу ў конкурсе адсутнічаюць абмежаванні для аўтараў і аўтарак твораў паводле ўзросту, грамадзянства, месца жыхарства і месца публікацыі твораў. Намінуюцца творы жывых аўтараў і аўтарак, упершыню апублікаваныя ў перыяд з 1 студзеня да 31 снежня 2024 года.
Заяўкі прымаюцца да 23:59 19 лютага 2025 года (беларускага часу).
Намінаваць можна не толькі кнігі!
Згодна з новым падыходам, на прэмію цяпер могуць намінавацца не толькі кнігі, але і артыкулы, падкасты, відэа/відэацыклы, кіно ды іншыя формы твораў, што адпавядаюць мэтам прэміі.
Падрабязней — у Статуце і Рэгламенце прэміі імя Багушэвіча.
Што атрымліваюць пераможцы?
Лаўрэаты і лаўрэаткі не толькі далучаюцца да шэрагу выбітных творцаў, але і атрымліваюць грашовую прэмію. Памер узнагароды вызначаецца на працягу сезона.
Прэмія імя Францішка Багушэвіча — гэта не толькі прызнанне, але і спроба аднавіць сувязь з мінулым, адкрыць новую прастору для дыялогу і самавызначэння праз мастацкае слова.
