На краўдфандынгавай платформе “Улей” распачаўся збор сродкаў на выданне кнігі для дзяцей 6-10 гадоў “Кот Шпрот і таямніца атракцыёнаў”. Аўтар –перакладчыца Ганна Янкута, ілюстрацыі – Лілі Давыдоўскай.
Краўдфандынгавая кампанія працуе па прынцыпе перадзамовы, і падтрымаўшы праект, чытачы атрымаюць кнігу па самым нізкім кошце.
Аднойчы кот Шпрот, які любіць уначы цішком збегчы з балкона і паблукаць па ваколіцах, знаёміцца з прывідамі, што жывуць пад вокнамі яго дома. Так пачынаюцца прыгоды ката і хлопчыка Алеся ў Парку Чалюскінцаў, завязваецца іх сяброўства з суседзямі – прывідамі, вераб’ямі і мышамі. Героі кнігі ратуюць сяброў, якія трапілі ў загадкавую пастку, і вучацца разам спраўляцца з нягодамі.
Чым кніга асаблівая? Па-першае, дзеянне адбываецца ў сапраўдных сённяшнім Мінску: вы пабываеце ў завулку Калініна, бульвары Талбухіна, Парку Чалюскінцаў. Па-другое, “Кот Шпрот і таямніца атракцыёнаў” – толькі першая кніга з серыі пра незвычайнага ката і яго сяброў. Чытачоў чакае працяг – каб сабраць усю калекцыю, варта пачынаць ужо цяпер! Па-трэцяе, ілюстрацыі ў кнізе жывуць асобным жыццём: калі іх уважліва разгледзець, то можна ўбачыць, што персанажаў трошкі больш чым у тэксце, і ў гэтых загадкавых персанажаў таксама ёсць свая цікавая гісторыя.
Ганна Янкута. Фота Алены Казловай
Кнігу напісала вядомая перакладчыца кніг для дзяцей і дарослых Ганна Янкута. Дзякуючы ёй па-беларуску з’явіліся на свет гісторыі пра Шэрлака Холмса, зімовая казка з прывідамі “Калядны харал” Дыкенса, кніга жахаў “Замак Отранта” Уолпала і шмат чаго яшчэ. Арыгінальныя малюнкі стварыла Ліля Давыдоўская – ілюстратарка і дызайнерка, выпускніца Акадэміі мастацтваў, якая жыве і працуе ў Каіры (Егіпет). Замалёўкі з розных гарадоў і краін можна паглядзець у яе акаўнце Instagram.
Па папярэдняй замове праз краўдфандынг вы атрымаеце кнігу па найніжэйшым кошце – адзін асобнік з аўтографамі аўтараў за 16 рублёў, 2 асобнікі – за 30 рублёў, 3 асобнікі – за 44 рублі.
Выхад кнігі плануецца на чэрвень 2018 года. Яна будзе мець прыкладна 80 старонак фармату, набліжанага да А4, у цвёрдай вокладцы, на шчыльнай крэйдаванай паперы. Усе ілюстрацыі (а іх будзе больш за 70) будуць каляровымі.
Дзеці даўно мусяць дазнацца праўду пра атракцыёны ў мінскім Парку Чалюскінцаў!
