Калі вы раптам яшчэ не вызначыліся, як цікава і з карысцю правесці выходныя, мы падкажам. Майстар-клас, сентыментальны шпацыр, файныя кірмашы, спектаклі — выбірайце мерапрыемствы ў сваім горадзе і на свой густ!
Беларусь
Мінск
Майстар-клас «Маляваны дыван» у Мінску
Вас чакае сустрэча з мастачкай Ірынай Князевай і майстар-клас па стварэнні маляванай макаткі (гэта дэкаратыўная сурвэтка, маленькі дыванок). Вы даведаецеся пра традыцыі бытавання і стварэння маляваных дываноў, пра вядомых народных і прафесійных мастакоў, якія займаліся гэтай справай. А пасля будзе творчасць: пры дапамозе трафарэтаў, фарбы, прастакутніка чорнай тканіны кожны здолее стварыць цуд — маляванку, на якой, адпаведна з народнымі уяўленнямі аб прыгажосці і шчасці, паплывуць лебедзі і расквітнеюць кветкі. Ён стане абярэгам і прынясе шчасце свайму ўладальніку!
Гродна
Казюкі ў Гродне
Збяруцца майстры з усёй Гарадзеншчыны — а можа, і з усёй краіны. Завітвайце набыць вырабаў ручной працы з цэглы, скуры, метала i дрэва, прысмакаў, сувеніраў — ды чаго толькі не! Будуць таксама майстар-класы ды песні з танцамі.
Сентыментальны шпацыр па габрэйскай Гародні
У нядзелю, 5 сакавіка, гарадзенскі музей гісторыі рэлігіі зноў кліча на экскурсію па гістарычных габрэйскіх куточках Гродна. Што вас чакае: экскурсія па малавядомых месцах горада, сінагога музей гісторыі рэлігіі, дэгустацыя страў габрэйскай кухні.
Віцебск
«(НЕ)ПРЫПЫНАК». Творчая сустрэча з Алесем Замкоўскім у Віцебску
Сярод гірляндаў і аўтарскіх фотаздымкаў, пад гукі глюкафона паслухаем глыбокія, метафарычныя, крыху дэкадэнцкія і адначасова пяшчотныя вершы на беларускай мове, пачуем цікавыя апавяданні пра тое, чым сёння жыве тэатр, а таксама сам Алесь.
Літва
Вільня
У пятніцу, 3 сакавіка, у Вільні — два вясновых кірмаша з удзелам белаурскіх майстроў. Адзін — традыцыйны Казюкас, дзе гэтым разам будзе шмат беларускіх рамеснікаў. То прыходзьце за падаруначкамі ды прыемнымі рэчамі — і падтрымайце сваіх!
Казюкас будзе праз усе выходныя, па 5 сакавіка.
Дата: з 3 па 5 сакавіка
Месца: Gedimino 37
Польшча
Познань
Беларускамоўны мніспектакль для дзяцей «Снежны чалавек» у Познані
«Снежны чалавек» — гэта гісторыя пра вялікія прыгоды ў зімовым заснежаным лесе, які знаходзіцца ў зімовым заснежаным краі, для тых, хто звязвае зіму з цудамі і дзяцінствам. Разам даведаемся, хто жыве ў гарах, і ўбачым, ці існуе насамрэч снежны чалавек, а таксама пастараемся знайсці адказ на пытанне, ці з’яўляюцца цуды проста выдумкамі дзяцей альбо гэта дарослыя прыдумалі, што іх няма? Запрашаюць сем’і з дзецьмі 6-10 год.
Люблін
Купалаўцы граюць спектакль «Дзяды» ў Любліне
3, 4 і 5 сакавіка Купалаўцы граюць у Любліне спектакль «Дзяды» паводле Адама Міцкевіча! То не прапусціце, прыходзьце ды прыязджайце на беларускія «Дзяды», якія, дзякуючы перакладу Сержа Мінскевіча, вяртаюцца да мовы, на якой іх мог пачуць Міцкевіч.
Вялікабрытанія
Лондан
Сустрэча, прысвечаная Івану Краскоўскаму, у Лондане
У суботу, 4 сакавіка, у Скарынаўскай бібліятэцы — сустрэча, прысвечаная Івану Краскоўскаму (1880-1955), беларускаму асветніку і ўкраінскаму дыпламату. Дарота Міхалюк і Тамаш Блашчак — двое з трох аўтараў кнігі — распавядуць пра постаць Краскоўскага і ягоную працу на карысць Беларусі і Ўкраіны.
Больш беларускіх падзеяў шукайце ў нашай Афішы.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
Карыстацца ім вельмі проста: выбірайце той ці іншы горад або ўсю краіну, падпісвайцеся асобна на ўсе анлайн-мерапрыемствы ці выбірайце варыянт all inclusive — усе беларускія падзеі свету (у тым ліку і анлайн-мерапрыемствы). А пасля — сачыце за беларускім дзвіжам і далучайцеся!
А па гэтай спасылцы можна знайсці афішу бясплатных мерапрыемстваў.Больш беларускіх падзеяў шукайце ў нашай Афішы.
