Памёр журналіст і гукарэжысёр з Беласточчыны Лукаш Стэпанюк

Памёр журналіст і гукарэжысёр з Беласточчыны Лукаш Стэпанюк. Яму было 45 гадоў. Пра гэта напісаў у сябе ў Фэйсбуку яго калега Яраслаў Іванюк.


stepaniuk-3sv3r.jpg
Лукаш Стэпанюк. Фота з Фэйсбука

«Быў... Хаця гэтае слова ажно цяжка пішацца...

Як: „быў“...?

Лукаш Стэпанюк „Стэп“ перш за ўсё быў добрым, сціплым чалавекам... Быў прафесіяналам у сваёй працы як гукарэжысёр і як журналіст...

Заўсёды стараўся дапамагчы ў кожнай справе. Памятаю як некалькі гадоў таму запісвалі аўдыякнігу з успамінамі Ларысы Геніюш „Птушкі без гнёздаў“. Step (хаця я заўсёды звяртаўся да яго: Лукаш) дзела гэтага аддаў сваю хатнюю студыю, а як аказалася, што на аплату працы не хапае грошай сказаў: „Ярэк, якія грошы? Ты пра што? Зробім. Зробім усё як трэба“. Такое, зрэшты, ад яго чуў я не адзін раз: „Для беларускасці зраблю шмат і без грошай“. Прычым ніколі тым не хвастаўся, не хваліўся.

Апошнім часам займаўся гукаапрацоукай аўдыякніг. Падрыхтаваў „Сядзібу“ Алеся Аркуша, працаваў над „Жэтонам на метро“ Андрэя Федарэнкі і „Айчынай“ Уладзіміра Арлова, якую рыхтаваў у версіі як аўдыя так і відэа.

Быў сябрам Управы Фонду Kamunikat.org

Лукаш, не час адыходзіць...

Дзякуй Табе за усё... Мы ўсе будзем вельмі сумаваць па Табе...

Бывай, Дружа...

Вечная Памяць...Шчырыя спачуванні блізкім і родным...» — напісаў Яраслаў Іванюк.