3 красавіка на 86-м годзе жыцця памёр мастак Уладзімір Крукоўскі.
Фота: Мікола Чэмер, nastgaz.by
Уладзімір Якаўлевіч Крукоўскі нарадзіўся 6 сакавіка 1937 года ў Асіповічах.
У 1954 годзе скончыў сярэднюю школу ў Ружанах. Вучыўся ў Беларускім політэхнічным інстытуце, служыў у войску, скончыў Віцебскі педінстытут.
На шлях беларушчыны трывала стаў яшчэ за савецкім часам. Пра што кажуць многія ягоныя працы таго часу, якія прысвечаны Янку Купалу, Францішку Скарыну, Кастусю Каліноўскаму ды іншым выбітным беларускім асобам. А таксама праблемам двухмоўя, культуры і экалогіі ў нашай краіне.
Сумесна з Яўгенам Куліком распрацаваў эталон герба «Пагоня», а таксама сцяга, якія ў верасні 1991 года былі зацверджаны ў якасці дзяржаўных сімвалаў Рэспублікі Беларусь.
Акрамя мастацтва, вядомы таксама сваімі журналісцкімі публікацыямі ў многіх беларускіх выданнях.
