Сярод спікераў — рэжысёры Наталля Ляванава, Андрэй Саўчанка, а таксама прадстаўнікі праграмы «Настаўнік для Беларусі», Сямейнага інклюзіў-тэатра «і», «Цім Тэатра», праекта «Тэатр-аўтобус» (Салігорск).
З 11 па 23 кастрычніка ў Польшчы праходзіць адзін з найбуйнейшых фестываляў для дзяцей і моладзі «Корчак», названы так па імені славутага педагога Януша Корчака.
15 кастрычніка ў яго рамках прэзентуюць праграму ФОКУС, якая папулярызуе веды пра тэатр пэўнай краіны. Сёлета праграма прысвечана Беларусі.
Выбраныя артысты раскажуць пра сваю тэатральную творчасць у Польшчы і за мяжой, творчыя тэндэнцыі ў тэатры для маладога гледача як у інстытуцыйным, так і ў незалежным полі.
У праграме:
10:00 Наталля Ляванава: Панарама тэатра юнага гледача ў Беларусі
11:00 Ганна Шарко: Дакументальны тэатр для моладзі. Андрэй Саўчанка: Арыгінальныя прыёмы тэатра імправізацыі ў працы з моладдзю
12:30 Алена Мельчанка: Праграма «Настаўнік для Беларусі» — пра самыя цікавыя тэатральныя праекты, рэалізаваныя ў яе рамках. Вольга Шынкевіч: Аб праекце вандроўнага тэатра, які рэалізуецца ў рамках праграмы «Настаўнік для Беларусі»
14:30-15:30 Леанід Дзінерштэйн і Ірына Кісялёва: Сямейны інклюзіў-тэатр «і» як мадэль сацыяльнай інтэграцыі
15:30-16:30 Алеся і Андрэй Бардухаевы-Арол «Цім Тэатр»: Праца над спектаклямі для відушчых і невідушчых у Беларусі і ў эміграцыі
Фота: Family.by
Дзень праграмы: 15 кастрычніка 2022 г.
Месца: Тэатральны інстытут, Варшава
Уваход на выступленні вольны, але патрэбная рэгістрацыя (e-mail: sekrety@korczak-festival.pl). Пры адпраўцы паведамлення арганізатары просяць пазначыць назву выступлення, на якое вы запісваецеся, і колькасць месцаў.
Куратар праграмы ФОКУС Беларусь — Наталля Ляванава, актрыса і рэжысёр, куратар праекта Kazachki.by (камерны тэатр для дзяцей) і Diafilm live (міждысцыплінарны тэатральны праект). Працавала ў Цэнтры эксперыментальнай рэжысуры Беларускай дзяржаўнай акадэміі мастацтваў, была адной з арганізатарак фестывалю тэатраў для дзяцей «Казачны джэм» (Мінск, 2015-2018). Зараз цікавіцца тэатрам для дзяцей 0-3 гадоў, а таксама дакументальнымі праектамі і праектамі для падлеткаў.
