Пернікі любяць і дзеці, і дарослыя, асабліва ў час зімовых святаў. Але мала хто ведае, што традыцыя выпечкі перніка сягае ў стагоддзі нашай гісторыі і беларусы цалкам могуць лічыць гэты слодыч традыцыйным. Пачытайце багатую гісторыю перніка і паспрабуйце згатаваць яго да святаў па нашым рэцэпце.
Што елі на святочную вячэру?
Святочная вячэра была поснай. Усе стравы гатаваліся на раслінным алеі, але можна было і на масле. Вячэра ў куццю складалася з дванаццаці страваў, столькі, колькі было апосталаў.
Пераважалі рыбныя стравы, прыгатаваныя самым розным спосабам, і, вядома, з абавязковай прысутнасцю на стале карпа альбо шчупака, ці судака. Калі страваў з рыбы было шмат і колькасць перавышала патрэбну, то стравы залічвалі за адну.
Пачыналася вячэра адным з традыцыйных супоў, елі чырвоны боршч або капуснік з вушкамі — невялічкімі вырабамі с цеста, з грыбным ці рыбным начыненнем.
Акрамя рыбных страў, падаваліся розныя кашы ці бігас з грыбамі, маглі есці гарох, пілі ўзвар — традыцыйны кампот з сушанай садавіны. Салодкія вырабы з цеста прысутнічаюць ябавязкова на Калядным стале — у першую чаргу гэта пернік і «макаўка», пяклі і «бабу», печыва і булкі.
Пернік пяклі яшчэ старажытныя славяне
Мучны выраб на мёдзе быў вядомы ўжо старажытным славянам. Але толькі з’яўлення іншых прынадаў пераўтварыла цвёрдае мядовае цеста, якое выкарыстоўваецца славянамі ў абрадавых мэтах, у пернік.
Найбольшай славай карысталіся пернікі, якія выпякаліся ў форме з майстэрскай разьбой. Папулярнымі былі Нюрнбергскія і торуньскія пернікі-«катажынкі». Яны былі вядомыя на сталах магнатаў і заможнай шляхты яшчэ з сярэдзіны 17 стагоддзя.
Падрыхтоўка цеста для пернікаў тады лічылася сапраўдным мастацтвам і адрознівалася ад сучасных рэцэптаў. У адмысловым сырым месцы цеста магло захоўвацца і месяц, а потым удалыя гаспадыні маглі наносіць на пернікі разнастайныя ўзоры, да прыкладу просты і папулярны ўзор шышкі, што адпавядае зімовым святам.
З цягам часу кадка для замешвання цеста стала часткаю пасагу для дзяўчыны, таму розную выпечку, і той жа пернік можна лічыць нацыянальнай стравай. А яшчэ пернікі ўпадабалі мужчыны, у час застолля імі закусвалі гарэлку або падавалі несалодкія пернікі разам з духмянай старкаю.
Як прыгатаваць калядныя пернікі?
На крыху разагрэтай патэльні варта растапіць вялікі кавалак масла, да яго дадаць мёд і цукар. Тапіць інгрыдыенты трэба пастаянна памешваючы да стану сіропу з бурбалкамі. Масе трэба даць крыху астыгнуць і потым паступова пачаць уводзіць муку, памешваючы будучае цеста. Дадаць крыху цынамону, ванілі і соку лімона або апельсіна, на ваш густ, можна дадаць какаву, тады колер пернікаў будзе цямнейшы, а смак з адценнем шакаладу. Убіць у масу адно цэлае яйка, і яшчэ адзін жаўток. Вымешваючы цеста, паступова дадавайце муку, пакуль маса не стане пластычнай і прыдатнай для працы рукамі.
Змясціце цеста мінімум на 4 гадзіны ў холад, каб яно выспела. Потым раскатайце да таўшчыні ў 5-6 міліметраў. З дапамогай кубка ці формачкі сфарміруйце з цеста будучыя пернікі. Калі вам падабаецца ідэя зрабіць слодычы, падобныя да лясной шышкі, з дапамогай кубка і рук зрабіце крыху выцягнутую форму і нажом нанясіце на пернікі ўзор.
Сырыя пернікі выкладзіце на кулінарную паперу, памясціце ў духавую шафу або печ пры 160 градусах на паўгадзіны. Перад падачай іх варта змазаць маслам і на пару хвілін вярнуць дапячыся. Слодычам трэба даць астыгнуць, а потым падаваць на стал з сочывам або напоямі. Упрыгожыць посуд з пернікамі можна цукровай пудрай.
Вясёлых святаў і смачна есці!
Нам спатрэбіцца:
-
Мука — 220 грамаў
-
Масла — 100 грамаў
-
Цукар — 80 грамаў
-
Мёд — 2 сталовыя лыжкі
-
Яйка — 2 штукі
-
Сок цытруса — дзве сталовыя лыжкі
-
Цынамон, ваніль і цукровая пудра — па смаку.
