У Беларусі дазволілі выкарыстоўваць кантэнт без згоды праваўладальнікаў з «недружалюбных» краін. Гэта вынікае з апублікаванага на Нацыянальным прававым інтэрнэт-партале Рэспублікі Беларусь закона «аб абмежаванні выключных правоў на аб’екты інтэлектуальнай уласнасці». Праўда, плаціць за выкарыстанне кантэнту усё адно давядзецца. Разбіраемся, які менавіта гэта кантэнт, што за краіны патрапілі ў спіс і каму пойдзе аплата.

Што можна «піраціць» не парушаючы закон?

Простымі словамі, зараз можна паказваць пірацкія фільмы і тэлешоў нават у кінатэатрах ці на тэлебачанні, а яшчэ карыстацца праграмным забяспячэннем і музычнымі творамі, што належаць пэўным праваўладальнікам, цалкам легальна. Закон прыняты і ўступае ў сілу праз 10 дзён пасля публікацыі і будзе дзейнічаць да 31 снежня 2024 года.

Зроблена гэта «у мэтах забеспячэння функцыянавання інфармацыйна-камунікацыйнай інфраструктуры, стварэння ўмоў для лічбавага развіцця і павышэння ўзроўню інфармацыйнай бяспекі, развіцця інтэлектуальнага і духоўна-маральнага патэнцыялу грамадства, забеспячэння доступу да дасягненняў сусветнай культуры і падзей сучаснага жыцця».

Згодна заканадаўству, за выкарыстанне чужой інтэлектуальнай уласнасці неабходна выплаціць грашовае ўзнагароджанне. Яно будзе залічваецца на рахункі патэнтнага ведамства на тэрыторыі Беларусі, і калі праваўладальнік не заявіць пра выплату на працягу трох гадоў, сплочанае ўзнагароджванне пералічваецца ў бюджэт. Патэнтны орган можа выкарыстоўваць 20% сумы на свае аперацыйныя патрэбы.

Што гэта за «недружалюбныя краіны»?

Прыняты закон дазваляе выкарыстоўваць аб’екты інтэлектуальнай уласнасці праваўладальнікаў з замежных дзяржаў, якія «здзяйсняюць недружалюбныя дзеянні ў дачыненні да беларускіх юрыдычных і (або) фізічных асоб».

Вось гэтыя краіны: Аўстралія, Албанія, Еўрасаюз (усе краіны-сябры), Ісландыя, Канада, Ліхтэнштэйн, Нарвегія, Новая Зеландыя, Паўночная Македонія, Злучанае Каралеўства Вялікабрытаніі і Паўночнай Ірландыі, ЗША, Чарнагорыя, Швейцарыя.

У пастанове тлумачыцца, што дакумент прыняты для «забеспячэння абароны нацыянальных інтарэсаў».

Спіс «недружалюбных» краін будуць выкарыстоўваць і пры працы з іншымі пастановамі.

АМ, budzma.org