У Шчучыне ўсталявалі помнік Шарлю дэ Голю, піша @spadczyna. Ён знаходзіцца побач з уваходам на завод «Аўтапровад». Аднак статуя пакуль завешана палатном. Дата адкрыцця помніка пакуль не вядома. 

Капітан дэ Голь, у будучым генерал, лідар Французскага Супраціву і Прэзідэнт Францыі, у час Першай сусветнай вайны знаходзіўся ў палоне ў адным з вытворчых памяшканняў шчучынскага прадпрыемства. 

Пэўны час лічылася, што гаворка ідзе пра польскі Шчучын, але больш падрабязныя дэталі прывялі даследчыкаў у Беларусь. Было, напрыклад, вядома, што ў будынку знаходзілася вытворчасць драўніны, а на той момант тут якраз працавала піларама князёў Друцкіх-Любецкіх. Адзначалася таксама тое, што ў будынку 13 вокнаў — гэты будынак захаваўся, тут знаходзіцца цэх завода Аўтаправод. Менавіта побач з ім і узведзены помнік па праекце скульптара Мікалая Байрачнага, архітэктараў В. Мусіенкі і А. Дзяміда.

У склад кампазіцыі ўваходзіць скульптура дэ Голя, выкананая ў поўны рост у вобразе капітана 33-га палка. Паўкруглая рэльефная сцяна сімвалізуе шлях ад палоннага-вязня да сімвала руху супраціву і прэзідэнта. На стэлах па баках будуць тэкст і сімвалы Прэзідэнта Францыі.