Мінскі рэп-выканаўца bayski стварае новы сучасны рэп па-беларуску. З нагоды выхаду свайго свежага рэлізу, трэка «Не існуе», музыка распавёў пра яго і пра ўласныя творчыя планы budzma.org.
Для каго гэты трэк, якім бачыш свайго слухача?
Для любога, у каго ёсць вушы і каму не хапае свежай белмоўнай музыкі (смяецца). Не думаю рамкамі і межамі. Раю слухаць і шукаць штосьці сваё, бо так яно і бывае. Мне прыляцеў водгук ад адной сяброўкі, маўляў, вось частка пра пачуцці мне спадабалася, а частка пра поспех і рок-стар лайф не. Я прачытаў, пасмяяўся, бо я такіх сэнсаў у песню і не закладаў нават.
Аб чым сам трэк?
Ён пра хартбрэйк, унутраных дэманаў, каханне і пра тое, што спальваць масты — не заўсёды адзіны правільны шлях, бо жыццё кароткае, а Мінск — адна вялікая вёска. Хто ж ведае, што і дзе цябе яшчэ напаткае?
Распавядзі гісторыю трэка, як з’явіўся, што «натхніла»?
Напрыканцы зімы я ўзяў адпачынак на працы, бо больш не мог вывозіць маральна. Ездзіў на студыю мо тыдзень, амаль кожны дзень пісаў нейкія дэмкі. Напраўду, я тады знаходзіўся ў не самым лепшым стане, бо ў канцы кастрычніка разышоўся з дзяўчынай. Усе думкі перакладваў у песні. Нешта фрыстайліў на біты, тое-сёе. Запісаў куплет дэмкі «Не існуе» і паехаў дадому. Вырашыў паслухаць у траліку і літаральна дрыжыкі пайшлі. Скідваў усім блізкім сябрам і пісаў: «Паслухайце, гэта ачмурэнна!»
Хто ўдзельнічаў у запісе, з кім працавалі? Ці ўсё сам?
Тэкст прыдумляў я, маё разбітае сэрца і хворая менталка (смяецца). За гукам, як заўсёды, пільна сачыў мой сябра, Кірыл. Ён накідаў біт, нічога сур’ёзнага не плануючы, а я паспрабаваў дапісаць тэкст і нешта атрымалася. Усё у такім хатнім фармаце, чысты «хоўм прадакшан». Потым, праўда, калі ён усё звадзіў, сказаў мне: «Слухай, а трэк капец які сумны насамрэч...»
Ці плануеш прэзентаваць нажыва?
Ды якое там... Хіба лайв зняць для ютубчыка
Што ўвогуле з канцэртнымі планамі зараз? Магчыма, з кім хацеў бы разам зрабіць выступ?
Планы ёсць заўсёды, але ў неатрыманай «гастролькі» могуць быць іншыя планы. Безумоўна, кайфова было б выступіць на якой-небудзь Vulica Ezha ці хаця б у «Пясочніцы». Не хачу нешта планаваць, але магчыма, атрымаецца паехаць у які-небудзь горад-два, сыграць лампавыя кватэрнікі ў акустычных версіях песень.
З кім увогуле хацелася б закалабіцца з беларускіх музыкаў, зрабіць сумесную працу?
Усе геніяльныя ўжо мёртвыя. А так я і сола сябе нядрэнна адчуваю. Шчыра кажучы, зараз па гуку з беларускамоўнай музыкі ніхто асабліва і не прываблівае і не робіць штосьці падобнае са мной. А на чужым полі граць не маю жадання. Магчыма, з украінскімі музыкамі штосьці атрымаецца, але пакуль рана прадбачваць.
