Паводле сусветнага «Індэксу свабоды прэсы – 2021», які штогод складае арганізацыя «Рэпарцёры без межаў» (RSF), журналістыка, якую называюць «асноўнай вакцынай супраць дэзынфармацыі», цалкам або часткова заблакаваная ў 73% са 180 краін, уключаных у рэйтынг арганізацыі — піша Свабода.
Беларусь у рэйтынгу апусцілася на 158-е месца. Журналісты ў Беларусі «падвяргаюцца беспрэцэдэнтным рэпрэсіям з-за спробаў схаваць масавыя вулічныя пратэсты, якія сталі адказам на спрэчны вынік прэзідэнцкіх выбараў», паказана ў справаздачы. Арганізацыя «Рэпарцёры без межаў» паказвае, што выпадкі пераследу журналістаў у Беларусі пачашчаюцца, а пакарання больш жорсткія.
—Беларусь — самая небяспечная краіна ў Еўропе для супрацоўнікаў СМІ. Крытычна настроеныя журналісты і блогеры падвяргаюцца пагрозам, гвалту, а таксама арыштаў. Ёсць выпадкі адключэння інтэрнэту, блакіроўкі вядучых навінавых сайтаў. Друкаваныя СМІ падвяргаюцца цэнзуры, а доступ да інфармацыі абмежаваны. Пасля спрэчных прэзідэнцкіх выбараў у жніўні 2020 году некалькі незалежных СМІ падвергліся пераследам з боку праваахоўных органаў, якія спрабуюць не дапусціць асвятлення масавых вулічных пратэстаў, — гаворыцца ў справаздачы па краіне.