27-гадовая Леся Руднік атрымала прэмію «Еўрапеец года». Узнагарода даецца людзям, якія ўклалі ўнёсак у супрацу паміж народамі Еўропы для ўмацавання свабоды і міра.
Прэмія была заснавана асацыяцыяй «Шведскі еўрапейскі рух». На сайце арганізацыі патлумачылі, што беларуску абралі невыпадкова — такім чынам яны «хочуць намінаваць усіх тых, хто змагаецца за дэмакратычную Беларусь».
«Прысуджаючы прэмію Алеся Руднік, мы хочам прыцягнуць увагу да тых, хто змагаецца за дэмакратыю ва Ўсходняй Еўропе. У канчатковым рахунку, гэтая барацьба тычыцца ўсіх нас і абароны ўсёй дэмакратычнай Еўропы. Мы спадзяемся, што прызнанне працы Алесі і беларускай дыяспары можа даць больш надзеі і прызнання ўсім тым, хто працуе ў імя свабоднай і дэмакратычнай Беларусі. Гэта асабліва актуальна ў той час, калі краіна часта асацыюецца з вайной Расеі супраць Украіны», — удакладняюць на сайце асацыяцыі.
Леся Руднік была старшынёй грамадскага абʼяднання «Беларусы Швецыі», удзельнічае ў дэбатах і дэманстрацыях, даследуе алічбоўку палітыкі ў аўтакратычных рэжымах і яе ўплыў на дэмакратызацыю.
