Этна-гурт Vuraj прэзентуе на Tuzin.fm сваю новую працу з таямнічай назвай «Шэсьць загадок». Гэта міні-альбом, у які ўвайшлі тры аўтарскія апрацоўкі народных сьпеваў ды тры іх аўтэнтычныя вэрсіі.
Рэліз ад Vuraj атрымаўся хоць і кампактным, але адразу з двумя цікавымі асаблівасьцямі. У яго ўвайшлі тры песьні – «Шэсьць загадок», «Гаю» і «Шчодры вэчор». Разам з трыма студыйнымі кампазыцыяміVuraj упершыню зьмясьціў першакрыніцы – аўтэнтычныя сьпевы бабуль з Заходняга Палесься. Яны натхнілі музыкаў на стварэньне альбому і яны ж леглі ў аснову аўтарскіх трэкаў.
«Кожная песня для нас што цэлы Сусьвет са сваей атмасфэрай, гісторыяй і сакральным кодам. Ты стараешся яе зразумець, адчуць і, як вынік, пераасэнсаваць», – кажа фронтмэн гурта Сяржук Доўгушаў.
На фота (зьлева направа): Ніна Міневіч, Надзея Супрун, Кацярына Рыжук. Фота Міхася Лешчанкі.
Другая асаблівасьць тычыцца ўжо саўнду гурта, які стаў яшчэ больш адметным з прыходам у калектыў таленавітага баяніста Аляксандра Ясінскага (BosaeSonca, The Unlimited Trio). «Гэта новы этап у разьвіцьці нашага гурта!», – заяўляе ў сувязі з гэтым лідэр Vuraj.
Прэзентацыя міні-альбому адбудзецца на канцэрце 22-га снежня ў 19.00 на ў клюбе Beer&Wine з нагоды 5-годьдзя гурта.
Vuraj – Шэсьць загадок
- Vuraj – Шэсьць загадок
- Vuraj – Гаю
- Vuraj – Шчодры вэчор
- Кацярына Рыжук – Шэсьць загадок
- Кацярына Рыжук – Гаю
- Ніна Міневіч і Надзея Супрун – Шчодры вэчор
Vuraj:
Cяржук Доўгушаў – вакал, сапілка
Аляксандар Ясінскі – баян
Вольга Палякова – флейта
Эрык Арлоў-Шымкус – кантрабас
Наста Папова – скрыпка
Даніла Залескі – бубны
запіс і мастэрынг – Андрэй Багданаў
дызайн вокладкі – Аляксей Кульбіцкі
