Скокі ў гонар У нескладовага

У сярэдняй школе № 12 г. Брэста працуюць два аддзяленні – музычнае і тэатральнае. Гэтай школе нададзена імя заслужанага дзеяча мастацтваў Беларусі Кастуся Губарэвіча. Мемарыяльная дошка з яго барэльефам бачна здалёк на будынку. Тут створаны цікавы музей, прысвечаны жыццю і творчасці драматурга. Няхай бы такія навучальныя ўстановы часцей сустракаліся ў Беларусі!

На пачатку траўня школу імя Кастуся Губарэвіча наведаў пісьменнік Уладзімір Ягоўдзік. Ён завітаў сюды ў межах культурніцкай кампаніі “Будзьма беларусамі!” і правёў два незвычайныя ўрокі. Першы адбыўся ў 2 “В” класе і быў прысвечаны дзівосным з’явам у беларускім алфавіце. Асабліва дзецям спадабаўся апостраф, а таксама літара У нескладовае. Яны ўмомант завучылі на памяць радкі: “Над нескладовым у загнуты хвосцік, нібы ў сабакі і ката. Таму сабака гаўкае − “Гаў-гаў!”, а кот заўсёды мяўкае − “Мяў-мяў!”

Потым у гонар У нескладовага і апострафа другакласнікі выканалі народныя скокі з прыпеўкамі. І госць з радасцю пераканаўся, што яны недарэмна займаюцца ў школе імя вядомага тэатральнага дзеяча.

А на другім уроку, што адбыўся ў 4 класе, вялася размова пра нашы старадаўнія легенды і паданні. Вучні з цікавасцю слухалі, як узніклі назвы рэк і азёр, вёсак і гарадоў. Варта адзначыць, што хлапчукоў і дзяўчатак хвалюе гісторыя роднай зямлі, што яны помняць пра падзеі далёкай мінуўшчыны і апошняй вайны.