Старэйшая навуковая супрацоўніца Цэнтра даследаванняў беларускай культуры, мовы і літаратуры Нацыянальнай акадэміі навук Беларусі Галіна Флікоп-Світа праз сваю старонку ў сацсетцы пачала знаёміць з беларускім іканапісам. Галіна выкладвае фота старажытных ікон, якія яна даследавала, і размяшчае спасылку на адпаведныя публікацыі, піша katolik.life.
Гэтая ініцыятыва выклікала вялікую цікавасць інтэрнэт-супольнасці — публікацыі даследчыцы атрымліваюць шмат рэакцый і каментароў.
Першыя дзве іконы, пра якія расказала Галіна — Божай Маці Снежнай праваслаўнага і каталіцкага паходжання.
«Пачынаю з аднаго з маіх любімых абразоў «Божая Маці Снежная» канца 18 стагоддзя з вёскі Суботы Драгічынскага раёна на Палессі. Звярніце ўвагу на аблічча Багародзіцы! Вядома ж, такая прыгажосць зразумела не ўсім. Але з гэтай прычыны дадзены абраз для мяне і стаў вельмі цёплым і дарагім. Захоўваецца ў Музеі старажытнабеларускай культуры НАН Беларусі».
Фота: Галіна Флікоп-Світа, Facebook
Наступнай Галіна размясціла ікону той жа іканаграфіі, што і папярэдняя — Божая Маці Снежная — з касцёла бернардынцаў у Нясвіжы. Гэты абраз 17 стагоддзя таксама захоўваецца ў Музеі старажытнабеларускай культуры НАН.
«Прыгажосць бывае рознай. І прыгажосць абразоў — таксама. Раней быў прыклад наіўнай іконы, якая прываблівала сваёй прастатой і мясцовымі палешуцкімі тыпажамі. А зараз перад вамі прыклад стрыманай і вытанчанай прыгажосці. Для канфесійнага балансу выкладваю гэты помнік каталіцкага паходжання».
Галіна працягвае сваю ініцыятыву — сачыць за яе далейшымі публікацыямі можна на яе старонцы ў Facebook.
