Папуляцыя гэтай жывёліны ў Беларусі знаходзіцца на мяжы знікнення. Каб уратаваць папуляцыю, апошнія вядомыя калоніі рабога сусліка перадалі пад ахову, паведамляе @wildlifebelarus.
Гэта дзве невялікія калоніі каля вёскі Цагельня (Нясвіжскі раён), а таксама другая па колькасці звяркоў у Беларусі калонія каля вёскі Сейлавічы. Акрамя гэтага, пад ахову ўзяты яшчэ 15,1 га асноўнай калоніі каля вёскі Юшавічы, якія заставаліся па-за аховай. Зараз у Юшавічах будзе ахоўвацца 96,8 га.
На сённяшні дзень мы маем шэсць перададзеных пад ахову калоній, якія знаходзяцца ў Нясвіжскім і Капыльскім раёнах, плошчай 138,94 га, — паведаміў эксперт Юрый Янкевіч, удзельнік экспедыцый па пошуку рабога сусліка. — Па выніках нашых улікаў, праведзеных ва ўсіх вядомых жылых калоніях, колькаснасць сусліка складае каля 5000 звяркоў.
Улічваючы, што палова калоній знаходзіцца ў дэпрэсіўным стане, неабходна распрацоўка дадатковых мер па іх умацаванні, і перадача ўсіх калоній пад ахову дае надзею, што папуляцыя рабога сусліка ў Беларусі будзе ўратавана.
