Юбілей літаратурнага класіка − гэта не проста юбілей аднаго чалавека ці нават асобнай нацыянальнай літаратуры, гэта юбілей народа, бо з лёсаў лепшых сыноў айчыны складаецца лёс Бацькаўшчыны. Жыццё народнага паэта Беларусі Якуба Коласа – выдатная старонка ў гісторыі беларускай літаратуры, а творчасць паэта ілюструе цэлую эпоху ў культурным жыцці краіны, велізарны пласт нацыянальнага жыцця.
З кожным годам усё большы прамежак часу аддзяляе нас ад таго гістарычнага часу, калі жыў і тварыў класік беларускай літаратуры, і таму больш прыцягальным становіцца не толькі вобраз Паэта – як выдатнейшага майстра паэтычнага слова, але Паэта – чалавека, з яго думкамі, клопатам, радасцямі і смуткам.
135-годдзе народнага паэта Беларусі будзе адзначана разнастайнымі святочнымі мерапрыемствамі, якія бліжэй пазнаёмяць грамадскасць Беларусі з літаратурным геніем.
31 кастрычніка ў Дзяржаўным літаратурна-мемарыяльным музеі Якуба Коласа ў 12.00 адбудзецца дзіцячы ранішнік “Казкі жыцця”. На свяце дзеці прадэманструюць веданне вершаў Якуба Коласа, пагуляюць у беларускія народныя гульні. На мерапрыемства запрошаны вядомыя беларускія дзіцячыя пісьменнікі.1 лістапада ў Дзяржаўным літаратурна-мемарыяльным музеі Якуба Коласа ў 14.00 адбудзецца прэс-канферэнцыя, прысвечаная святкаванню 135-годдзя з дня нараджэння народнага паэта Беларусі Якуба Коласа.
2 лістапада ў Дзяржаўным літаратурна-мемарыяльным музеі Якуба Коласа ў 10.00 адбудзецца ўрачыстае гашэнне паштовай маркі, выпуск якой прымеркаваны да 135-годдзя з дня нараджэння народнага паэта; у 10.30 ‒ пачнецца ХХХІ міжнародная навуковая канферэнцыя “Каласавіны-2017”, у якой прымуць удзел навукоўцы з розных рэгіёнаў Беларусі, супрацоўнікі Цэнтра даследаванняў беларускай культуры, мовы і літаратуры, сталічных і абласных вышэйшых навучальных устаноў, музеяў, а таксама навукоўцы з Расіі, Украіны і Літвы.
3 лістапада ў Беларускай дзяржаўнай філармоніі ў 13.00 пройдзе святочны канцэрт “Спяшайцеся з паэтам стрэцца…” з удзелам вядучых мастацкіх калектываў і выканаўцаў рэспублікі, у 15.00 на плошчы Якуба Коласа адбудзецца ўскладанне кветак да помніка Якубу Коласу.
4 лістапада на малой радзіме Якуба Коласа ў Стаўбцоўскім раёне (філіял “Мікалаеўшчына”, г. Стоўбцы) у 10.00 пачнецца рэспубліканскае свята паэзіі, песні і народных рамёстваў “То – водгулле душы паэта…”, удзел у якім прымуць прадстаўнікі творчай інтэлігенцыі краіны: пісьменнікі, паэты, артысты, мастакі, супрацоўнікі музеяў, навукоўцы, мастацкія калектывы краіны.
Паводле арганізатараў
