Цяпер дзе б вы ні былі, вы можаце заставацца на беларускай хвалі і даведвацца пра беларускія падзеі — канцэрты і выставы, акцыі ды імпрэзы, лекцыі, майстар-класы і фэсты — у горадзе, дзе жывяце, па ўсёй краіне, анлайн ці наогул па ўсім свеце.
Ад 2020 года Беларусь зазнала масавую хвалю эміграцыі. Безліч нашых суродзічаў на ўласным досведзе зразумелі, як цяжка на новым месцы ўліцца ў мясцовае жыццё, адшукаць сяброў ды паплечнікаў, не згубіць сувязяў з беларускім асяродкам.
З ботам больш няма патрэбы па крупінках шукаць звесткі пра беларускія падзеі — дастаткова выбраць у боце горад, у якім вы апынуліся, і падпісацца на абнаўленні. Бот максімальна акумулюе такую інфармацыю, а Вы будзеце атрымліваць пуш-паведамленні і зможаце наведаць беларускія мерапрыемствы, дзе можна пазнаёміцца з суайчыннікамі, усталяваць кантакты, знайсці аднадумцаў. Ды і проста ў цёмныя часы ўсвядоміць, колькі ўсяго беларусы робяць па розных краінах, і адчуць сябе несамотным!
Бот будзе карысным не толькі для тых, хто з’ехаў, але ж і для беларусаў на Радзіме. Ён своечасова нагадае пра цікавыя падзеі ў розных гарадах Беларусі і дапаможа адчуваць повязь з іншымі, калі здаецца, што ўсе з’ехалі і нічога не адбываецца.
Зараз у боце знойдзеце абвесткі пра падзеі ў Беларусі, Польшчы, Літве, Латвіі, Германіі, Грузіі, Вялікабрытаніі, Чэхіі, ЗША, а таксама анлайн. І бот актыўна пашыраецца! У меню рэгулярна дадаюцца новыя опцыі і гарады: надоечы, напрыклад, з’явіўся Уроцлаў і Быдгашч. Абяцаюць і новыя краіны, дзе жыве беларуская дыяспара і ідзе беларускі рух.
Карыстацца ботам проста: выбірайце той ці іншы горад або ўсю краіну, падпісвайцеся асобна на ўсе анлайн-мерапрыемствы ці выбірайце варыянт all inclusive — усе беларускія падзеі свету (у тым ліку і анлайн-мерапрыемствы). А пасля — сачыце за беларускім дзвіжам і далучайцеся!
Калі вы ладзіце мерапрыемства альбо ведаеце, што ў вашым горадзе яно будзе, дасылайце ў бот абвестку, а бот падзеліцца ёю з усімі карыстальнікамі.
Каманда бота падкрэслівае, што чула рэагуе на водгукі і заўсёды радая фідбэку, таму калі вам не хапае пэўнага горада ці краіны, калі вы сутыкнуліся з багам бота, калі ў вас ёсць прапановы, як бот удасканаліць — паведамляйце! Гэта можна рабіць проста праз радок паведамлення!
Далучайцеся і дзяліцеся спасылкай на бот з сябрамі - https://t.me/budzma_razam_bot!
Будзьма беларусамі ў любой кропцы свету і будзьма разам!
Калі вам падабаюцца нашыя відэапраекты і аўтарскія артыкулы, вы можаце падтрымаць рэдакцыю «Будзьмы», набыўшы нам кубачак кавы. Гэта дапаможа нам стварыць больш цікавых відэаролікаў і арыгінальных артыкулаў.
