Беларуская спявачка Chornabrova, актрыса, тэатральная рэжысёрка Паліна Дабравольская адмыслова для budzma.org падзялілася ўласным топам улюбёных беларускіх песень.
34mag.net
«Увогуле апошнія гады мне вельмі цяжка слухаць музыку. Таму што, напэўна, я не магу ўспрымаць яе як фон. Калі я слухаю музыку (любую), мой мозг не адпачывае, а наадварот пачынае яшчэ больш ствараць праекцый/карцін/сцэн, калі я слухаю музыку, я не магу працаваць, таму што мая ўвага знаходзіцца менавіта там у той момант.
Я выбрала менавіта гэтыя песні, таму што іх я не пераключаю на наступныя ў сваім плэйлісце. Увогуле, вельмі мала слухаю беларускай музыкі. Штосьці люблю, але не магу сказаць, што слухаю. Для кожнага свой перыяд у жыцці. Некаторыя групы і песні магу паслухаць 1 раз на год — мне гэтага дастаткова».
1.«Nie Chapai» — Koob Dele
Пазнаёмілася зусім нядаўна з гэтай песняй, на жаль, не даходзілі рукі. Лера — несамавітая артыстка. Вельмі шкада і ў той жа час прыемна, што яе няшмат. Бо кожная праца — настолькі якасная і разумная, чаго не сустрэнеш у большасці артыстаў. Яна дакладна ведае, што яна робіць з гукамі, нотамі, эфектамі. Гэта навука, а не проста акорды. «Не чапай» — песня, якую, пачуўшы ўпершыню, я слухала запар 5 разоў і кожны раз адкрывала для сябе яе з іншага боку.
2. «Бегчы» — AKUTE
Akute — Бегчы Прыклад песні, якую я ніколі не прапускаю ў праслухоўванні. Яна адпавядае любым маім настроям: сумным, светлым, хот&хорні, звычайным — whatever.
3. VIII — CHORNABROVA
Не магу не сказаць пра свае песні. Напэўна, таму што кожны раз іх слухаю, каб знайсці самой у сабе касякі (смяецца). Калі казаць пра сваю музыку, то, канешне, яна павінна вельмі дакладна трапіць у мой асабісты муд, калі выпадкова пачынае граць. Але песня VIII, напэўна, прыклад той, што можа цябе крыху выратаваць ад паўсядзённасці. Там шмат цеплыні. Я спрабавала так яе напоўніць, каб было трошкі лягчэй жыць.
4. «Цветок» — Петля Пристрастия
Гурт, які са мной вельмі даўно. Гурт, песні якога я ведаю на памяць, пачынаючы ад першых альбомаў. Але чаму менавіта гэтая песня? Неяк яна засталася ў маім сэрцы сваёй простасцю і наўпростасцю. Калі раней я магла б напісаць «Гомункул», напрыклад, ці «А вообще...», то сёння я абіраю «Цветок».
5. Yegor Zabeliv — Niti (album)
Вельмі паважаю і люблю музыку Ягора. Першыя гады, калі яна з’явілася ў маім жыцці, я казала, што менавіта так гучыць мая душа. Так я сябе чула. Не ведаю, ці шмат змянілася. Альбом Niti — абавязковы для праслухоўвання. Памятаю, як чакала, што ён выйдзе, а калі выйшаў — проста лягла на падлогу і праслухала ад пачатку да канца.
П.Ж. budzma.org
Глядзіце яшчэ: ТОП беларускіх песень ад беларускіх музыкаў. Песні, якія натхняюць і кранаюць беларускіх музыкаў.
