• budzma.org
  • Пра нас
  • Крама
Будзьма беларусамі! Будзьма беларусамі!
telegram www.instagram.com/budzma/ Facebook.com vk.com twitter.com youtube.com
  • Актуаліі
  • Меркаванні
  • Гісторыя
  • Літаратура
  • «Музыка»
  • Гатуем з «Будзьма!»
  • «Гісторыя за 5 хвілін»
  • «Трызуб і Пагоня»
  • «Разумняты»
  • Вандруем разам
  • Афіша
12.03.2018 | Гісторыя

Топ-7 фактаў пра замак-прывід на Палессі, які знік 300 гадоў таму

Тэмай апошняга “Цэху жывой гісторыі”, што праводзіцца ўжо больш як год у бары Beer&Wine у Мінску на Кульман, 9, стаўся лёс зруйнаванага падчас Паўночнай вайны замка Жабер, а таксама страчанага вялізнага арсенала, які там размяшчаўся.

Назвы Жабер, што на поўначы Берасцейшчыны, вы не пабачыце ў турыстычных буклетах побач з Мірам, Наваградкам ці Лідай. Ды і сам эпітэт “замак”, відаць, не самы прыдатны, хутчэй фартэцыя. Чым у такім разе яна цікавая? Папраўдзе, усяго адным гістарычным эпізодам: сваім кароткім росквітам і раптоўнай гібеллю. Гэтыя абставіны і сталіся для мясцовых, археолагаў і авантурыстаў нагодай доўгія гады шукаць у ваколіцах колішняй фартэцыі артэфакты мінулага.

Пераапрануў слуг у маскавітаў і “нацкаваў” на канкурэнта

Упершыню двор Жабер згадваецца пад 1546 годам. Побач, за пяць кіламетраў, – мястэчка Хомск, якое некалі было ХоЛмскам. Гэта вельмі характэрна, бо збудаванае яно на пагорку сярод багнаў. У наступным багны зрабіліся дадатковым абарончым фактарам і для самой фартэцыі. Падчас “Невядомай вайны” Жабер, найхутчэй, быў яшчэ дваром, бо ні пра якія сутычкі і аблогі ў гэтым кантэксце згадак няма, хоць праз тыя мясціны і праходзіла расійская групоўка Хаванскага.

Жаберскія знаходкі (фота Радыё Свабода)

Жаберскія знаходкі (фота Радыё Свабода)

Усе канфлікты тут да пэўнага часу зводзіліся да побытавых “разборак”. Так, прыкладам, у 1660-м, як паведамляюць судовыя кнігі, уласнік Жабера пераапрануў сваіх слуг у маскоўскіх стральцоў і “натравіў” на канкурэнта з прозвішчам Навіцкі. Тыя з крыкамі “Рубі! Рубі!” загналі Навіцкага ў раку, а няўдаха ледзь не патануў.

Жабер як магніт прыцягваў і Радзівілаў, і Вішнявецкіх

Усё цікавае ў Жаберы пачынаецца крыху пазней. Фартыфікацыі тут пачынаюць будавацца за Янам Каралем Дольскім, які зрабіў бліскучую кар’еру за Янам Сабескім. Яму акурат належала большасць маёнткаў у Пінскім павеце, тут жа Дольскі збудаваў два замкі: Жабер і Каралін. Чаму ён укладаўся менавіта ў гэты, згублены сярод багнаў, рэгіён? Таямніца.

Маёнтак у Жаберы на той час налічваў пад тысячу падданых: гэта нямала, але ў параўнанні з маёнткамі Радзівілаў – не так і шмат. Разам з тым, толькі за 1690 год тут ажно пяць разоў бывае Караль Станіслаў Радзівіл, згодна з ягоным жа дзённікам. А гэта ўжо паказчык статусу.

Караль Станіслаў Радзівіл

Пасля смерці Дольскага маёнткам валодае ягоная ўдава Ганна, Радзівіл працягвае наведвацца і да яе… Пасля ўдава прадае ўсё майно Міхалу Вішнявецкаму і з’язджае ў Варшаву. Вішнявецкія ўпісваюць спадчыну ў свой тытул, робячыся “Вішнявецкімі па Дольску” – для іх гэта важна. Гісторыкі звязваюць гэта з інтарэсамі магнатаў у Пінскім павеце. На гэты момант Жабер выглядае як умацаваная земляная фартэцыя, а Каралін – хутчэй не фарпост, а рэпрэзентатыўная рэзідэнцыя пад Пінскам.

Арсенал, лепшы за Слуцк і Біржы

Міхал Вішнявецкі – не толькі магнат, але і, мякка кажучы, не апошні чалавек у “генштабе” ВКЛ: спачатку польны, а пасля і вялікі гетман. Карыстаючыся пасадай, ён спрабуе ператварыць Жабер у сапраўдны Форт Нокс. Зразумела, не за свае грошы, а за дзяржаўныя. Напярэдадні і на першым этапе Паўночнай вайны Вішнявецкі збірае ў Жаберы фантастычны артылерыйскі арсенал.

Выява Пагоні на гармаце, адлітай у ВКЛ

Выява Пагоні на гармаце, адлітай у ВКЛ

Давайце параўнаем з іншымі арсеналамі ВКЛ: у Біржах 53 гарматы, у Слуцку – 47, а ў “нейкім там” Жаберы – ажно 58! Прычым і ў Біржах, і ў Слуцку Радзівілы збіралі арсеналы дзесяцігоддзямі, а ў Жаберы на ўсё было максімум дваццаць гадоў. Нешта Вішнявецкі вязе з Віленскага арсенала, нешта здабывае шляхам экспрапрыяцыі, напрыклад, тры цяжкія гарматы былі прывезеныя з Ляхавіцкага замка Сапегаў (апошнія падтрымалі ў вайне шведаў). Адна з іх з калібрам 15 см важыла больш за 2 тоны. Так у замку збіраецца ўнікальны арсенал з тонаў бронзы, аздобленай мастацкім ліццём.

Карл ХІІ пад сценамі Жабера: “Даю вам 24 гадзіны…”

Вясной 1706 года Карл ХІІ падыходзіць да Пінска. Паперадзе яго крочыць слава непераможнага і жорсткага военачальніка, гарнізоны скараюцца яму адзін за адным. Так, Нясвіж здаўся за гадзіну, якую кароль даў абаронцам для роздуму. У Ляхавічах замкнуліся 1500 казакоў Мазэпы, але і тыя здаліся, даведаўшыся, што Карл разбіў рускі корпус, які ішоў ім на дапамогу.

Але Жабер на той момант – наймацнейшы  ў рэгіёне, падрыхтаваны выдатна! Ды і весці аблогу сярод багнаў зусім не зручна. Але… слабы маральны дух усё сапсаваў. Цікава, што шведы перахапілі ліст, скіраваны абаронцам, дзе даецца загад затапіць у выпадку чаго ўвесь арсенал. Такім чынам, у стойкасць абаронцаў не верылі нават военачальнікі.

Карл ХІІ

Карл ХІІ

9 траўня 1706 года да Жабера падышоў чатырохтысячны корпус шведаў, а праз тры дні даехаў і сам Карл ХІІ. Кароль даў абаронцам на роздум 24 гадзіны (больш, чым іншым фартэцыям), пасля чаго гарнізон вывесіў белы сцяг. У выніку 815 абаронцаў трапілі ў палон, шведы атрымалі 58 гарматаў, якія абаронцы так і не затапілі, а таксама… знайшлі ў сутарэннях сваіх палонных суайчыннікаў, якіх тут трымалі ажно з 1702 года.

Хабар у 2000 дукатаў і немінучая расплата

Затрымлівацца ў Жаберы шведам не было аніякага рэзону, таму ўмацаванні трэба было спаліць і зрыць, палонных – адправіць у Швецыю, а арсенал – знішчыць, вывезці альбо надзейна схаваць. Аб практыцы зрывання валоў і знішчэння фартыфікацыяў мы ведаем на прыкладзе Нясвіжа. Замак руйнавалі 10 дзён, а 23 траўня Карл ХІІ зноў прыязджае сюды, каб зірнуць на вынік. Пасля шведы рушылі далей, на Валынь, а замак так на стагоддзі і застаўся “раскіданым гняздом”: больш ужо ніколі тут нічога не будавалі.

''Спаленне'' гарматы

”Спаленне” гарматы

Так замак ператварыўся ў легенду: ужо ў 1730-м, неўзабаве па сканчэнні Паўночнай вайны, сюды прыязджае Міхал Радзівіл Рыбанька, каб зірнуць, што засталося ад Жаберскай фартэцыі. Але найбольш да фармавання легенды спрычыніўся Юльян Нямцэвіч, які апісаў у мастацкай форме “здраду каменданта” Яна Бутмана, які нібыта атрымаў ад шведаў 2000 дукатаў за здачу замка. Пасля яго нібыта забіў асабіста Карл ХІІ, які як рыцар з агідай паставіўся да ўчынку вайскоўца.

Гісторыя каменданта ў выніку аказалася рамантычнай прыдумкай. Рэальны Бутман апынуўся ў палоне і трапіў у Швецыю. Захаваліся нават звесткі, як ён патрабуе ад сваіх турэмшчыкаў, каб тыя вярнулі яму, шляхцічу, канфіскаваную фамільную зброю. Паводле шведскіх гісторыкаў, не толькі камендант, але і іншыя палонныя былі перапраўленыя ў Швецыю і разышліся потым па ўсёй краіне. Ці вярнуўся хто? Невядома.

Гармата 1631 года ў засеку з аўсом

Замчышча тым часам няўмольна зарастала і ператваралася ў пустку, равы – у балота. Адно сяляне з навакольных вёсак знаходзілі тут то ядры, то старадаўнія манеты. Паводле законаў Расійскай імперыі, усе габарытныя знаходкі, кшталту гарматаў, трэба было перадаваць у Пецярбург. Тут і пачынаюцца дэтэктыўныя гісторыі. Прыкладам, знойдзеныя ля Жабера ў 1903-м некалькі гармат да царскай сталіцы так і не даехалі: зніклі невядома куды са станцыі Драгічын.

Дакладна вядома пра лёс як мінімум адной гарматы, якую прыхаваў Антоні Ісідор Віславух, уладальнік маёнтка, што месціўся побач. Адзінаццаць гадоў ён захоўваў гармату… у засеку з аўсом. Коні да канца ніколі не даядалі, таму гармата ўвесь час была надзейна прысыпаная.

Пашкоджаная гармата 1631 году, якую захоўваў Антоні Віславух, Музей войска польскага, Варшава

Пашкоджаная гармата 1631 году, якую захоўваў Антоні Віславух, Музей войска польскага, Варшава

У 1915-м, падчас адступлення рускіх войскаў, Віславух вырашыў перахаваць гармату ў парку, але нехта расказаў пра хітрыкі пана маёру-немцу, які прыйшоў да Антонія і запытаўся пра гармату ў лоб. Той быў змушаны паказаць схованку. Як культурны чалавек немец прапанаваў Віславуху дамову: немцы не чапаюць гармату, але пан пазначае маёра як асобу, што дапамагла ў захаванні гістарычнай спадчыны.

Так гармата даляжала да савецка-польскай вайны 1920 года. Тады ўжо спадзявацца на культуру захопнікаў не было рэзону: уся калекцыя старажытнасцяў Віславуха з дапамогай генерала Сікорскага адпраўляецца ў Варшаву. Сярод экспанатаў была і гармата 1631 года адліўкі, якая і сёння захоўваецца ў Музеі войска польскага.

Вядома таксама пра знаходку ў 1910-м годзе прыкладна 10 гарматаў, якія разышліся немаведама куды. Магчыма, нешта пераплавілі, нешта схавалі, нешта прадалі: звестак няма. Ужо за савецкім часам, у 1960-я, на замчышчы працавала навуковая экспедыцыя, апантаная знаходкамі жаберскай артылерыі, але безвынікова.

Ад 5 да 7 гарматаў з Жабера сышлі за апошнія 10 гадоў

Даследаванні Жаберскага замка археолагамі і дайверамі аднавіліся ў 2015 годзе. Гэта ўнікальная гісторыя для беларускай падводнай археалогіі: праца ў забалочаных равах фартэцыі і ў рэчышчы Ясельды ідзе ўзімку, бо ў цёплую пару года гэта нашмат складаней. Ядры і кавалкі драўляных замкавых канструкцыяў даследчыкі выцягваюць са слаёў ілу, які нагадвае “манную кашу”… Плюс сітуацыі ў тым, што іл выдатна кансервуе знаходкі: як драўляныя кавалкі разваднога мосту са слядамі агню (мост, відаць, шведы палілі ў апошнюю чаргу), так і марцірныя бомбы, вага якіх дасягае 50 кг.

Разам з тым даследчыкі не страчваюць надзеі дабрацца і да гарматаў. Паводле разлікаў дайвераў і гісторыкаў, пэўную частку з 58 гарматаў расцягнулі за часамі Расіі. Ад 5 да 7 гарматаў, як ні дзіўна, хутчэй за ўсё сышлі ўжо за апошнія 10 гадоў (ёсць ускосныя сведчанні, што нешта ўсплывала на чорным рынку). Але нешта мела і застацца. 5, 10, 20? Не ведае ніхто.

Задаволены знаходкамі дайвер (фота Радыё Свабода)

Задаволены знаходкамі дайвер (фота Радыё Свабода)

Экспедыцыі працягваюцца штогод, хлопцы працуюць за ўласныя грошы і толькі гэтай зімой упершыню атрымалі салярку з бензінам ад мясцовых уладаў. Працоўная група, у прыватнасці, кіраўнік дайвінг-цэнтра “Марскі Пегас” Уладзімір Ліхачоў, запрашае далучацца да росшукаў у наступным сезоне ўсіх ахвочых. У такім разе, магчыма, Беларусь неўзабаве атрымае не толькі каштоўныя артэфакты, але і новы турыстычны пункт – замак у Жаберы.

Алесь Кіркевіч

Даведка: Экспедацыя каля вёскі Жабер праводзіцца Інстытутам гісторыі НАН Беларусі разам з дайвінг-цэнтрам “Sea Pegas”. Навуковы кіраўнік Ліневіч С.Б. Разам з дайверамі і археолагамі ў даследаванні замка прымае ўдзел к.г.н. Волкаў М.А.

 

Апошняе ў рубрыцы:

valiancina_shauchenka
Культура

Новы выпуск падкаста «Малус» дасяжны на стрымінгах

Абсурд пачынае панаваць тады, калі настае бясплоднасць сэнсаў або калі яны прыходзяць у гэты свет ужо мёртванароджанымі....

valiancina_shauchenka
Літаратура

Кнігу Альгерда Бахарэвіча «Тэатр шчаслівых дзяцей» можна паслухаць у аўдыяфармаце

Кнігу Альгерда Бахарэвіча «Тэатр шчаслівых дзяцей» можна паслухаць на платформе «Кніжны воз», — паведамляецца на старонцы...

valiancina_shauchenka
Грамадства

Помнік Ларысе Геніюш у Зэльве дэмантаваць не будуць

Такі адказ мясцовых уладаў на свой зварот аб зносе помніка Ларысе Геніюш на Зэльвенскіх могілках атрымала праўладная...

valiancina_shauchenka
Культура

Іван Кірчук — сапраўдны «Варажбіт»

У музеі «Лошыцкая сядзіба» прайшла творчая сустрэча вядомага беларускага этнографа, фалькларыста і музыканта Івана...

Апошнія навіны

    Культура
    Новы выпуск падкаста «Малус» дасяжны на стрымінгах
    Літаратура
    Кнігу Альгерда Бахарэвіча «Тэатр шчаслівых дзяцей» можна паслухаць у аўдыяфармаце
    Грамадства
    Помнік Ларысе Геніюш у Зэльве дэмантаваць не будуць
    Культура
    Іван Кірчук — сапраўдны «Варажбіт»
    Вандруем разам
    Унікальнае месца для адпачынку. Расказваем пра адметнасці Ліпічанскай пушчы
    Афіша Літаратура
    Ужо заўтра адбудзецца анлайн-прэзентацыя рамана Шчэпана Твардаха “Кароль” у беларускім перакладзе
    Гісторыя
    Невядомыя беларускамоўныя тэксты з атачэння Кастуся Каліноўскага у новым нумары «Homo Historicus 2023».
    Кіно
    Воля Чайкоўская: «Беларускае кіно — самабытнае, аўтэнтычнае, рызыкоўнае. Яшчэ — вельмі каштоўнае, таму што знаходзіцца на мяжы выжывання. Яго практычна як від можна заносіць у Чырвоную кнігу»
    Мастацтва
    Вясна перадусім! Выстава Лявона Тарасэвіча ў варшаўскай галерэі Monopol
    Грамадства Адукацыя
    «Як мама і педагог я вельмі прашу слухаць і чуць дзяцей!» Тры гісторыі пра булінг і гвалт
    Культура Літаратура
    Аўтапартрэт у шаўковай кашулі. Словы пра самога сябе, як ты разумееш
    Грамадства
    Наталля Пінчук: Важна гаварыць сёння не толькі пра Алеся – пра ўсіх, хто за кратамі ў Беларусі
    Грамадства
    Францыя. Мы маем права на паўстанне
    Культура
    Пра што размаўляюць з Вясной у гукальных песнях і прычым тут «Купалінка»
    Культура
    У Юрмале адкрылася выстава «Крэатыўная рэвалюцыя. Беларусь 2020»

Афіша

  • 30.03

    ПАДЗЕЯ ДНЯ: Гурт PyLai ў Батумі

  • 30.03 — 22.04Выстава ткацкіх працаў у Мінску
  • 30.03Экспазіцыя да 100-годдзя з дня нараджэння Алены Васілевіч у Мінску
  • 30.03 — 31.03Выстава, прысвечаная мастаку кіно Яўгену Ганкіну, у Мінску
  • 30.03 — 31.03«У краіне мар». Выстава, прысвечаная Канстанцыі Буйло, у Мінску
  • 30.03 — 30.04Выстава «Ян Вермеер» у Мінску
  • 30.03 — 02.04Выстава Усевалада Швайбы і Тамары Дзяменцьевай «Узы меж нами» ў Гродне
  • 30.03 — 30.04 «Партрэт часу»: калекцыя жывапісу Белгазпрамбанка ў Магілёве

УСЕ ПАДЗЕI

Рассылка навінаў

Важнае пра нас

  • Што такое "Будзьма беларусамі!"
  • Рэкламадаўцам
  • Асобы кампаніі
  • Усе праекты "Будзьма!"
  • Рэдакцыйная пошта: [email protected]

Папулярнае

    • Адкуль мы ўзяліся: 7 кніг пра нашу гісторыю
    • «Пагоня» не з’яўляецца «экстрэмісцкім» сімвалам
    • Топ-3 смешных выпадкаў з Якубам Коласам
    • Унучка пакаранага паўстанца, якая стала адной з самых вядомых у свеце жанчын-хірургаў
    • Што паслухаць з беларускай музыкі на Дзень Волі
© Грамадская культурніцкая кампанія «Будьма беларусамі!», 2008-2019.
Логотип