Галоўны беларускамоўны рэпер 2010-х Vinsent (Зміцер Папко) апошнім часам асабліва не з’яўляўся ў інфапрасторы i не выдаваў новых рэлізіў. Але музыка абяцае здзівіць аматараў сваёй музыкі новымі сінгламі, вельмі не падобнымі на ўсю папярэднюю творчасць, ужо ў гэтым годзе. А пакуль Vinsent падзяліўся з budzma.org сваім топ-5 беларускіх трэкаў.
Фота: Monika Ney
1. Зьміцер Вайцюшкевіч — «Дзе мой край»
Трэк Вайцюшкевіча «Дзе мой край» на верш Уладзімера Караткевіча зьяўляецца фундамэнтальнай беларускай песьняй. Гэты верш генія Караткевіча — манумэнтальны твор беларускай вершаванай лексыкі. Тут добра ўсё, словы як камяні: вельмі дакладна і нічога лішняга. А маэстра Вайцюшкевіч напісаў выдатную мэлёдыю і выдатна выканаў.
2. Лявон Вольскі — «Дай мне знак»
Гэта адна з маіх улюбёных песень спадара Вольскага. Файная аранжыроўка, спалучэньне рок-бэнду з сымфанічным гучаньнем. Глыбокая лірыка, кантрапункты, усё ідэальна. Лявон Вольскі — гэта скарб беларускай культуры. Ён выдатны і паэт, і музыка. Я бы мог назваць песьню «Тры чарапахі» як найбольш папулярную беларускую песьню апошніх дзесяцігодзьдзяў, але захацелася ўзгадаць нешта іншае, і на думку прыйшла песьня «Дай мне знак».
3. Shuma — «Rano Rano»
Вельмі люблю творчасьць гэтай фармацыі. Выдатны прыклад, як можна зрабіць сучасны модны саўнд у спалучэньні зь беларускай этнікай. Тут і выдатны вакал Русі, супэрпрадакшн ад Alexis Scorpio. Вартыя ўвагі і жывыя выступы Русі разам з Budzko, яны робяць з душой і на якасьць, як мае быць.
4. Gleboki Smak — «Шлях да майго дому»
Gleboki Smak — таленавіты рэпэр, мне вельмі падабаецца ягоная творчасьць. Ён мае выключны густ да музыкі, і ў прыватнасьці, да гіп-гопу. Мне падабаюцца і біты, на якія ён чытае, і ягоная падача. Раю паслухаць альбом «Drenny Ton».
5. Новае неба — «Гэта мы»
Ёсьць такія песьні, слухаючы якія, хочацца ісьці наперад. Вельмі натхняльны твор Андрэя Мельнікава, выдатныя вершы. Я адмыслова адзначыў аранжыроўку гурта «Новае неба», таму што мне падабаецца гэтая песьня ў розных аранжыроўках, а таксама і ў арыгінале. Мяркую, што паўстане яшчэ не адна вэрсія гэтага трэку.
П. Ж., budzma.org
