У крамах з’явіўся цэлы шэраг мясной прадукцыі ад кампаніі “Белатміт”, аформлены па-беларуску і з выявай цмокаў. Такім чынам стала відавочна, што беларускі цмок мала таго што дабраўся дык яшчэ і рэкламуе сасіскі, каўбаскі, шпікачкі і шашлык.
“Будзьма” паразмаўляла з Вольгай Кашкан, крэатыўным дырэктарам, заснавальнікам брэндынгавай агенцыі Fabula, пра стварэнне “цмокавай канцэпцыі” і брэндынг на аснове нацыянальнай культуры.
– Як з’явілася канцэпцыя афармлення?
– Кліент прыйшоў да нас ужо з назвай гандлёвай маркі – «Шпагель», якая аднолькава пісалася і на беларускай, і на рускай мовах. Мы ж як беларускаарыентаваная агенцыя прапанавалі зрабіць выдатную нацыянальную марку, таму што ўбачылі ў назве багаты патэнцыял для развіцця менавіта беларускамоўнай камунікацыі.
– Чаму з усіх казачных істотаў беларускай міфалогіі вы абралі менавіта цмока?
– «Шпагель» – гэта мясныя прадукты для грылю, то бок каўбаскі, шпікачкі, сасіскі і шашлык, якія смажацца на агні. Назва гандлёвай маркі выдатна падышла для імені брэнд-персанажа Шпагеля, кулінара па мясных стравах, які на сваю шпагу, як на шампур, насаджвае прысмакі. Вось толькі дзе ўзяць агонь, каб іх падсмажыць? Так і ўзнікла ідэя казачнага Цмока, чыя вогненная сіла дазволіла ўтварыць ім са Шпагелем выбітны саюз двух аматараў грылю з краіны Смакатандыі.
– Можа, вы натхняліся пэўнымі “цмокавымі” гісторыямі?
– Вобраз Цмока знаёмы нам па казках з дзяцінства – гэтая міфічная істота палохала і захапляла сваёй магутнасцю адначасова. Але наш Цмок – не літаратурны герой, а цалкам фантазійны персанаж. Напэўна, таму ён і атрымаўся такім абаяльным і вясёлым.
– Сам вобраз цмока – ці карысталіся вы пры ягоным стварэнні нейкімі прататыпамі?
– Не. На Цмока Караткевіча дакладна не арыентаваліся.
– Ці плануеце вы і надалей выкарыстоўваць у афармленні прадукцыі беларускую мову ці нешта з беларускай традыцыі?
– Мы не толькі плануем, але і актыўна гэта робім! Так, напрыклад, менавіта намі былі распрацаваныя такія нацыянальнаарыентаваныя брэнды, як «Князь Рыбанька» – першы беларускі брэнд у сваёй прадуктовай катэгорыі, створаны на падмурку нацыянальнай гісторыі і культуры (пазнаёміцца з ім можна па спасылцы); мясны брэнд «YESцi», на ўпакоўцы прадуктаў якога мы бачым выявы людзей, апранутых у традыцыйныя беларускія кашулі з вышыўкай, якія сабраліся за шчодрым сталом, што ледзь не ломіцца ад прысмакаў згодна з найлепшымі традыцыямі беларускай гасціннасці; брэнд прэміяльнай маркі эксклюзіўных мясных біяпрадуктаў «Ветлінка», дызайн якіх быў распрацаваны на беларускіх каштоўнасцях і ўвасоблены ў рэканструяваных дэталях адзення і побыту, прамаляваных у адпаведнасці з гістарычнай традыцыяй (https://fabula.by/news/news-adnak/)… Усе пералічаныя праекты, дарэчы, былі адзначаныя ўзнагародамі ў мінулым годзе на фестывалях AD.NAK! і OPEN.
Мы верым, што з’яўленне сапраўдных беларускіх гандлёвых марак, асабліва ў сектары FMCG, – гэта просты, дзейсны і яскравы крок па падтрыманні і развіцці ў беларусах нацыянальнай самасвядомасці.
– Ці плануеце вы сёлета ўзяць удзел у Фестывалі беларускамоўнай рэкламы AD.NAK?
– Так, безумоўна! У тым ліку і са «Шпагелем».
Мікалай Левертаў
