Заўтра стартуе Тыдзень беларускіх дакументальных фільмаў у Тбілісі У рамках Дзён беларускай культуры адбудуцца ажно чатыры кінасеансы ў Cinema House па 2 Dzmebi Kakabadzeebi St. Уваход на ўсе прагляды вольны, але колькасць месцаў абмежаваная, таму арганізатары заклікаюць прыходзіць загаддзя! Прагляды з 27 па 29 ліпеня будуць пачынацца штодня а 19 гадзіне. 31 ліпеня — а 18 і 20.
27 ліпеня пакажуць стужку «Галасы. Дзе мой край», прысвечаны Вольнаму хору. У жніўні 2020 года ў Мінску на прыступках Беларускай дзяржаўнай філармоніі сабраліся людзі, у іх быў плакат «У нас скралі голас», і яны маглі супрацьпаставіць гвалту толькі песні, якія спявалі разам. Хор стаў з’яўляцца на пратэсных маршах, у гандлёвых цэнтрах і метро, натхняючы людзей спевамі пра годнасць, мужнасць, долю і веру беларусаў. Гэтак нарадзіўся адзін з сімвалаў беларускага супраціву — Вольны хор.
28 ліпеня — «Дом там, дзе я?» Арцёма Лобача. У фільме пераплятаюцца лініі жыцця чатырох беларускіх творцаў. За кароткі час яны перажылі дзве катастрафічныя трансфармацыі. У сустрэчах і вандроўках з аўтарам яны разважаюць пра гэты час і прастору, сваё месца ў ёй і дзеляцца сваім адчуваннем Дома. Пасля прагляда адбудзецца абмеркаванне стужкі з сааўтарам Сяргеем Будкіным.
29 ліпеня можна будзе паглядзець «Белае сонца чырвонага лета» (рэж. Паліна Ідрысава, Яна Нова, Глеб Асмалоўскі) Беларусь. 9 жніўня 2020 года. У знак нязгоды з фальсіфікаванымі вынікамі, жыхары гарадоў выйшлі на мірны пратэст і сутыкнуліся з гвалтам з боку сілавікоў. Наступствы не сціхаюць ужо два гады. Фільм раскрывае тэму пратэсту і яго ўплыў на лёсы людзей вуснамі відавочцаў.
31 ліпеня — «Courage» Аляксея Палуяна. Фільм апавядае пра беларускія падзеі 2020 года. Яго галоўнымі героямі сталі акцёры «Свабоднага тэатра». Сусветная прэм’ера фільма адбылася на Берлінскім кінафестывалі.
