21 лютага, у Міжнародны дзень роднай мовы, падчас юбілейнага, дзясятага занятка «Мовы нанова» ў Беластоку напішуць Агульнанацыянальную дыктоўку. Прачытае яе спявачка і журналістка Кацярына Ваданосава.

Заняткі ладзяцца ў беларускім хабе «Новая Зямля» (Kard. Stefana Wyszyńskiego 6A). Імпрэза пачнецца ў 19:00, але арганізатары просяць прыйсці трошкі загадзя.

Тыя, хто не мае магчымасці прыйсці ў хаб, могуць далучыцца да дыктоўкі анлайн. Трансляцыя будзе весціся на ютуб-канале «Мовы нанова».  Арганізатары абяцаюць добры гук і запіс. Тэкст дыктоўкі для самаправеркі будзе выкладены ў апісанні трансляцыі на YouTube, адразу пасля таго, як дыктоўка закончыцца.

Такім чынам напісаць дыктоўку, агучаную Кацярынай Ваданосавай, змогуць не толькі беларусы з Беластока, але і з любой кропкі свету!

Калі: аўторак, 21 лютага 2023, 19:00 — па польскім часе, 21:00 — па беларускім часе, 20:00 — па літоўскім і ўкраінскім часе, 22:00 — па грузінскім часе.

Дзе: Беларускі хаб «Новая Зямля» (Kard. Stefana Wyszyńskiego 6A)

Уваход вольны, але данаты вітаюцца.

Нагадаем, што «Мова Нанова» — гэта бясплатныя курсы беларускай мовы для ўсіх, хто хоча лепей ведаць родную мову, гісторыю і культуру. Гэта жывыя, эмацыйныя заняткі і сустрэчы з цікавымі беларусамі ў Беластоку.