“Тыдзень нефармальнай адукацыі-2009”, ініцыятарамі якога сталі грамадскія аб’яднанні, што працуюць у сферы нефармальнай і грамадзянскай адукацыі, традыцыйна адбудзецца 20-27 верасня ў Беларусі.
На працягу сямі дзён прадстаўнікі недзяржаўных, бізнэс і адукацыйных структур рознага накірунку будуць абмяркоўваць і дэманстраваць, як з дапамогай нефармальнай адукацыі павысіць якасць жыцця”
Паляпшэнне якасці жыцця, сярод іншых вызначэнняў, можа разумецца таксама як мажлівасць свабоднага выбару чалавекам розных ладаў жыцця. Чым большая разнастайнасць ладаў жыцця прадстаўлена для выбару, тым вышэй якасць жыцця чалавека. Нефармальная адукацыя (НФА) у такім падыходзе можа разглядацца як інструмент, які дазваляе зразумець, убачыць і далучыцца да ўсёй разнастайнасці існуючых і мажлівых ладаў жыцця, а таксама як эфектыўны інструмент, які садзейнічае фарміраванню ключавых сацыяльных, грамадзянскіх і іншых кампетэнцый, неабходных для гэтага.
Мэта “Тыдня нефармальнай адукацыі-20009” – прадэманстраваць не толькі пашырэнне разнастайнасці адукацыйных прадуктаў, прадстаўленых у Беларусі, але і разнастаўнасць саміх пастаўшчыкоў паслуг у галіне НФА
Асаблівасцю “Тыдня НФА” у гэтым годзе стануць тэматычныя акцэнты кожнага дня:
1. Прадстаўляем разнастайнасць: ад танцавальных гурткоў да экспертных семінараў.
2. НФА: методыкі, тэхнікі, падыходы.
3. НФА: перашкоды і бар’еры на шляху паляпшэння якасці жыцця.
4. Прафесіяналізм і павышэнне кваліфікацыі ў НФА: абмен вопытам паміж бізнэсам, НДА і царкоўнымі адукацыйнымі ініцыятывамі
5. НФА: пашырэнне кампетэнцый як шлях да павышэння якасці жыцця.
6. НФА – унікальнае беларускае “ноу-хау”
7. Разам да павышэння якасці жыцця: планы і перспектывы.
Усе мерапрыемствы размеркаваны па тэматычных днях. Цэнтральнай падзеяй стане круглы стол “Нефармальная адукацыя ў паляпшэнні якасці жыцця: праблемы і перспектывы”, запланаваны на 22 верасня 2009 г. Ініцыятары круглала стала ГА “Цэнтр сацыяльных інавацый” прапануюць у фармаце панэльных дыскусій абмеркаваць ролю, месца, мажлівасці і шляхі развіцця НФА у паляпшэнні якасці жыцця. Сярод запрошаных дакладчыкаў – эксперты з Беларусі, Латвіі, Германіі.
Наведаць семінары па пермакультуры і па змяненні клімату, а таксама паспрабаваць свае сілы на майстар-класы па роспісе “эка” – сумак запрашае Экатаварыства “Зялёная сетка”.
Тым, каго больш цікавяць прыкладныя веды, арганізатары прапануюць стаць удзельнікам круглага стала “Мажлівасці Інтэрнэт-тэхналогій у павышэнні канкурэнтаздольснасці моладзі на рынку працы” (МГА “Фокус-група”) і наведаць прэзентацыю “Сам сабе турагент альбо як вандраваць актыўна, цікава і эканомна” (ГА “ВІТ”).
І гэта далека не ўсё, чаму можна будзе навучыцца на “Тыдні нефармальнай адукацыі-2009”. На свае семінары, трэнінгі, прэзентацыі, ралевыя гульні, майстар-класы запрашаюць ГА “Адукацыйны цэнтар “ПОСТ”, МГА “Адукацыя без межаў”, ГА “Цэнтр “Трэці сектар”, БМГА “Новыя твары”, ТАА “Цэнтр креатыўных тэхналогій “Квадратны апельсін”, ТАА “Адкрыты навучальны цэнтр РАТРЫС” і інш.
Мерапрыемствы адбудуцца ў Мінску, Гродна, Брэсце, Гомелі. Пазнаеміцца з падрабязнай праграмай “Тыдня НФА-2009”, а таксама даведацца пра месца і час правядзення розных мерапрыемстваў можна на сайтах
www.adukatar.net,
www.methodology.by,
www.eurobelarus.info.
А таксама ў каардынатара Тыдня Яніны Зінчанка [email protected]
