Фестываль «Краiна марозiва» вырашыў незвычайным чынам заахвоціць беларусаў, якія ў паўсядзённым жыцці размаўляюць на роднай мове. Мінчукам прапануюць распавесці пра свайго беларускамоўнага сябра і выказаць яму “рэспект” на сайце белыполюс.бел. За гэта сябра зробяць ганаровым госцем фестывалю і задарма пачастуюць марозівам «Белы полюс 1938». Усё гэта адбудзецца 30 чэрвеня каля Мінск-Арэны. Распавесці аб сваім беларускамоўным сябры, якім ты ганарышся, можна на працягу трох дзён — з 19 па 21 чэрвеня.

Па дадзеных перапісу насельніцтва ад 2009 года, амаль 2/3 жыхароў нашай краіны валодаюць беларускай мовай. Аднак толькі 6% карыстаюцца ёй падчас зносінаў з сябрамі, на працы ці дома.

— Беларусы, якія ў паўсядзённым жыцці размаўляюць на роднай мове, наўрад ці ставяцца да гэтага, як да пэўнага дасягнення, і могуць пасаромецца самі рэгістравацца на сайце. Але нам вельмі хочацца заахвоціць гэтых людзей, таму мы прапануем родным ці знаёмым вылучыць сваіх “беларускамоўных” прыяцеляў, — распавядае намеснік дырэктара па маркетынгу брэнда “Белы полюс” Максім Журовіч. — Для мяне самога больш звыкла размаўляць на рускай мове, але я заўжды з вялікай павагай стаўлюся да сваіх беларускамоўных сяброў і калегаў. За выбар на карысць беларускай мовы кожнаму з іх хочацца сказаць “дзякуй”. І гэта адна з мэтаў, дзеля якіх мы і запусцілі акцыю «Краiна марозiва».

        Збіраць заяўкі на сайце будуць да пятніцы. Пасля гэтага іх апрацуюць і надрукуюць асабістыя пашпарты ганаровых грамадзянаў «Краiны марозiва». Па іх на фэсце кожную гадзіну белыя мядзведзі будуць частаваць бясплатным пламбірам. Арганізатары не ведаюць колькі беларускамоўных грамадзянаў зарэгіструюць, таму пакуль што падрыхтавалі 2000 пашпартаў. Але калі будзе неабходна, надрукуюць дадатковую партыю спецыяльна да фэсту.

“Краiна марозiва” з’явіцца 30 чэрвеня вакол Мінск-Арэны. Тэматычны забаўляльны парк пабудуюць у гонар 80-годдзя беларускага пламбіру. Свята абяцаюць зрабіць мова-фрэндлі: афіцыйнай мовай будзе беларуская, а імправізаванай сталіцай стане “Мова-сіці”. Тут можна будзе згуляць у вялізарны беларускамоўны “Скрабл”, паспрабаваць сябе ў “Мафіі” і іншых настольных гульнях.

Госці наведаюць сеанс speed-dating, дзе іх навучаць упэўнена размаўляць з кім заўгодна і на любую тэму менавіта па-беларуску: пра надвор’е, аб займальнай кнізе, новым блокбастэры альбо ўлюбёным смаку марозіва.

— Размаўляць на роднай мове ці не — гэта асабісты выбар кожнага чалавека, але любіць яе — гэта, бадай што, абавязак. Мы незвычайна робім такі вялікі акцэнт на беларускай мове на нашым фестывалі. “Белы полюс 1938” — гэта пламбір, які ў гэтым годзе мы аднавілі па нацыянальным рэцэпце 80-гадовай даўніны. Такі прадукт абавязаны размаўляць са спажыўцамі на мове Коласа і Купалы. У “Краіне марозіва” мы паспрабуем паказаць усю яе прыгажосць і сучаснае гучанне. Мы упэўненыя, што яна можа дарыць такія ж пазітыўныя эмоцыі, як і марозіва, —  тлумачыць Максім Журовіч.

Музычная частка фестывалю таксама будзе толькі беларускамоўная. Першыя чатыры “Дзякуй” ужо паляцелі да хэдлайнераў фэсту —  Akute, Shuma, «Разбiтае сэрца пацана» и «Маланка Аркестр».

Паводле прэс-рэлізу