У музеі ў Цеханоўцы на Падляшшы адкрылася экспазіцыя беларускіх строяў. Аўтарка гістарычнай і традыцыйнай вопраткі Кацярына Ваданосава падкрэслівае, што кожны строй — гэта не толькі мастацкі твор, але таксама вынік навуковага даследавання.
Беларускае Радыё Рацыя цытуе віцэ-дырэктарку музея ў Цеханоўцы Ганну Вісьнеўскую:
"Беларуская культура нам вельмі блізкая, бо ў нашым скансэне маем хаты усходне-падляшскія, вельмі падобныя да беларускіх, у якіх паказваем тую частку польскай культуры, якая тут, на Падляшшы, з’яўляецца актуальнай".
Кацярына Ваданосава: «Выпадкова маім знаёмым была знойдзена цэлая куча тканін на сметніку. Ён мне затэлефанаваў. Я прыйшла, адабрала тое, што мне падалося натуральнай тканінай. Дома праверыла. Аказалася, што гэта белая воўна. І ў мяне з гэтай белай воўны пашыты строй 14 стагоддзя і жаночая зімовая традыцыйная світа. Я больш за ўсё ганаруся тым, што выстаўка паўстала. Няхай гэтая выстаўка будзе такім агульным вынікам маёй працы цягам апошніх некалькі гадоў».
Арганізатарам выставы з’яўляецца Музей у Цеханоўцы а таксама Цэнтр беларускай культуры ў Беластоку.
Чытайце яшчэ:
«Яе сукенка стала яе зброяй». У Польшчы адкрываецца выстава калекцыі гістарычных і традыцыйных строяў Кацярыны Ваданосавай
