У варшаўскай прасторы Scena Chmielna 13 жніўня публіку пазнаёмілі са спеўнікам бяседных песень, які нядаўна выдаў праект Tradycyja. На імпрэзе выступілі гурты «Каляжанкі» з Палесся, «Жэмэрва» і «Асочнікі» з Падляшша. Глядзіце, як гэта было, у нашым рэпартажы.
Удзельнікі прэзентацыі
Спеўнік «Бяседныя песні» — ужо трэці, выдадзены праектам Tradycyja. Перад гэтым былі народны і калядны. Спеўнікі прызначаныя для таго, каб звычайныя людзі без асаблівай музычнай падрыхтоўкі, сабраўшыся добрай кампаніяй, маглі разам паспяваць.
Спеўнік «Бяседныя песні»
Спеўнік «Бяседныя песні»
Спеўнік «Бяседныя песні»
Тэксты «Бяседных песень» запісаныя кірыліцай і лацінкай (мабыць, з разлікам на інтэрнацыянальныя сяброўскія колы). Кожны тэкст суправаджаецца нотамі. Для тых, хто не ўмее чытаць ноты альбо любіць вучыць песні на слых, ёсць QR-коды са спасылкамі на аўдыядадатак да спеўніка і на альбом «Бяседныя песні», які праект Tradycyja выдаў у 2019 г.
Укладальнікі спеўніка Сяржук Доўгушаў і Наста Някрасава
Што асабліва цешыць душу фалькларыста, укладальнікі спеўніка Сяржук Доўгушаў і Наста Някрасава пазначылі звесткі пра запіс усіх песень, якія трапілі ў зборнік. Таму зацікаўлены чытач можа даведацца, што некаторыя творы запісалі яшчэ ў 1950-х — 1990-х гг. вядомыя даследчыкі Зінаіда Мажэйка, Ларыса Касцюкавец, Галіна Кутырова-Чубаля, Галіна Барташэвіч, Антон Гурскі, Уладзімір Сысоў, Таццяна Песнякевіч. З пашпартоў песень відаць таксама, што цікавы матэрыял у вёсках Беларусі і польскага Падляшша можна зафіксаваць і ў ХХІ стагоддзі: самы новы запіс зроблены летась. Што цікава, сярод выканаўцаў, песні якіх трапілі ў зборнік — паэт Рыгор Барадулін і актрыса Паўліна Мядзёлка. Першы спяваў песні сваёй маці Алесю Камоцкаму, а другая падзялілася тым, што запомніла ў Астравецкім раёне, з Рыгорам Шырмам.
Цешыць таксама сціслая, але вельмі змястоўная прадмова да спеўніка. З яе можна даведацца, што бяседныя песні могуць звацца таксама «застольныя», «гасцявыя», «п’яніцкія», «карчомныя», «банкетовыя», «пірушачныя», «кірмашовыя». Спявалі іх падчас хрэсьбінаў, вяселляў, кірмашоў, заканчэння талакі і жніва, а таксама іншых застолляў.
Прэзентацыя ў Варшаве
Варшаўская прэзентацыя спеўніка «Бяседныя песні» — адна з шэрагу запланаваных у Польшчы. Ужо прайшла імпрэза ў Беластоку. Наперадзе — Познань (18 жніўня).
Наведнікі прэзентацыі спеўніка «Бяседныя песні»
Прэзентацыя пачалася проста на вуліцы Nowy Świat, якая на выходныя ператвараецца ў пешаходную. Пасля некалькіх песень наведнікаў запрасілі ў прастору Scena Chmielna, дзе рассадзілі за сталы, спрабуючы стварыць атмасферу сапраўднай бяседы.
Выступоўцы на прэзентацыі спеўніка «Бяседныя песні»
Выступоўцы таксама сядзелі пры сталах.
Выступоўцы на прэзентацыі спеўніка «Бяседныя песні»
Выконвалі песні і з новага зборніка, і з рэпертуару гуртоў — удзельнікаў прэзентацыі. Наведнікаў заклікалі далучыцца да супольнага спявання.
Гурт «Жэмэрва» складаецца з былых і цяперашніх навучэнцаў беларускага ліцэя ў Бельску Падляскім. Само слова значыць вясёлую і гарэзліваю кампанію моладзі.
Гурт мужчынскіх спеваў «Асочнікі» таксама ўтварыўся на Падляшшы, хаця ўдзельнікі жывуць у розных гарадах Польшчы. Для назвы выбралі азначэнне вартаўнікоў Белавежскай пушчы.
Удзельніцы гурта «Каляжанкі» прыехалі са Столінскага раёна. Жанчыны спяваюць песні сваіх родных мясцін. Назва іх адсылае да сяброўства, што звязвае спявачак («каляжанка» на мясцовай гаворцы і ў польскай літаратурнай мове значыць «сяброўка»).
Гурт «Жэмэрва»
Прэзентацыя скончылася танцамі і супольнымі спевамі на вуліцы.
Афіша выступу гурту «Каляжанкі» 14 жніўня
Гурт «Каляжанкі» можна будзе паслухаць у Варшаве таксама сёння. Выступ адбудзецца ў Амбасадзе традыцыйнай музыкі (Jazdów, 3/20) у 19.00. Жанчыны выканаюць лірычныя і застольныя песні, паграюць танцы.
Алена Ляшкевіч, budzma. org
Фота і відэа аўтаркі
Чытайце яшчэ: У Варшаве прайшоў цыкл вечарын «Жывая музыка Беларусі»
