Першы фестываль актуальнага ўкраінскага мастацтва ў Беларусі “Перелаз” пройдзе 12–13 снежня ў мінскай галерэі сучаснага мастацтва “Ў”. Наведвальнікі змогуць атрымаць асалоду ад незадэклараваных украінскіх вершаў, думак і перажыванняў.
“Перелаз” з’яўляецца своеасаблівым адказам фестывалю “Беларуская вясна”, які тры гады запар прадстаўляў беларускую неафіцыйную культуру ва Украіне. Такім чынам арганізатары вырашылі выраўнаваць баланс культурнага абмену паміж нашымі дзяржавамі, ўзмацніўшы напрамак Кіеў–Мінск.
У Мінск прыедзе ўкраінскі паэт і перакладчык Сашко Ірванец, каб разам з Уладзімерам Арловым сустрэцца з беларускімі чытачамі. Слэмеры Дзмітрый Лазуткін, Арцём Паляжака, Павел Карабчук у складзе ўкраінскай паэтычнай зборнай дадуць бой магутнай беларускай камандзе; вядучым слэму будзе Андрэй Хадановіч.
Арганізатарам фестывалю ёсць творчая ініцыятыва “Беларускі дэсант” – супольнасць неабыякавых да свежай і актуальнай беларускай культуры ўкраінскіх грамадзянаў, гатовых прасоўваць яе ва Украіне. Гэтая фармацыя дапамагае цікаваму беларускаму contemporary art знаходзіць свайго спажыўца ва Украіне, а цяпер прадстаўляе ўкраінскае мастацтва ў Беларусі.
“Перелаз” гасцінна прымае ў сваю творчую прастору галерэя сучаснага мастацтва “Ў”, якая знаходзіцца па адрасе: пр. Незалежнасці, 37а; інфармацыйныя партнёры фестывалю – партал грамадзянскае кампаніі “Будзьма беларусамі!” і газета “Наша Ніва”.
У суботу, 12 снежня, у 14:30 адбудзецца паказ анімацыі Яўгена Сіваконя і яго вучняў “Анімацыя.UA”.
Яўген Сіваконь – Майстар і Настаўнік украінскай анімацыі, які за 17 гадоў выхаваў не адзін дзесятак таленавітых украінскіх мультыплікатараў, удзельнікаў і лаўрэатаў міжнародных фестываляў.
У праграме будзе паказаная новая праца лаўрэата Берлінале Сцяпана Коваля “Хачу быць цвёрдым” (Украіна, 2009).
Аматараў якаснай анімацыі чакае 120 хвілін гэтага мультыплікацыйнага шчасця. Два дзесяткі дасціпных і адначасова філасофскіх мультфільмаў будуць цікавыя як дарослым, так і дзецям.
Прадставіць падборку вядомы беларускі рэжысёр-аніматар Міхаіл Тумеля.
Уся праграма.
У нядзелю, 13 снежня, у 14:30 пачнецца кінапаказ падборкі фільмаў украінскай школы дакументальнага кіно “Дaкументалістыка.UA”.
Фелікс Собалеў – вядомы ўкраінскі рэжысёр, які зрабіў рэвалюцыю ў сусветнай дакументалістыцы. У прыватнасці, ён першым пачаў здымаць навукова-папулярныя фільмы пра псіхалагічныя эксперыменты. Будзе паказаны яго найлепшы і заўсёды актуальны фільм “Я і іншыя”.
Фільм таленавітага рэжысёра, а цяпер кіна- і медыяпрадусара Аляксандра Раднянскага “Cтомленыя горадам” будзе таксама прадстаўлены гледачам фестываля “Перелаз”.
Гледачы ўбачаць рознае кіно – пра тое, як адзін чалавек перамагае лёс, а другі згаджаецца з большасцю, нават калі ўсе гавораць на чорнае, што яно белае.
Падборку і свой фільм прадставіць малады ўкраінскі рэжысёр Сяргей Волкаў.
Уся праграма.
Праграма, афіша і ўся свежая інфармацыя пра фэст – на сайце belarus.org.ua.
Рэкламны відэаролік да фестывалю: https://vimeo.com/8045931
Да сустрэчы на “Перелазе”!
Кантакты:
Юлія Нузбан
фестываль “Перелаз”
прэс-аташэ
+380951680969
yulia.nuzban@gmail.com
Тэгі: Мінск, Украіна
