У Беларусі падрыхтаваны праект закона аб унясенні змяненняў у Крымінальны кодэкс і Крымінальна-працэсуальны кодэкс, — паведамляе Office Life. Праект зменаў у Крымінальны кодэкс прадугледжвае з'яўленне артыкула 198-1 «Парушэнне заканадаўства аб сродках масавай інфармацыі».
У ёй, у прыватнасці, гаворыцца, што распаўсюджванне уладальнікам інтэрнэт-рэсурсу, не зарэгістраванага ў якасці сеткавага выдання, інфармацыі, распаўсюджванне якой забаронена на інтэрнэт-рэсурсах у адпаведнасці з заканадаўчымі актамі, здзейсненае паўторна на працягу года пасля накладання адміністрацыйнага спагнання за такое ж парушэнне, караецца грамадскімі працамі, або штрафам, або абмежаваннем волі на тэрмін да двух гадоў, або пазбаўленнем волі на той жа тэрмін.
Таксама прапануецца дапоўніць Крымінальны кодэкс артыкулам 342-1 «Парушэнне парадку арганізацыі або правядзення масавых мерапрыемстваў».
Парушэнне ўсталяванага парадку правядзення сходу, мітынгу, вулічнага шэсця, дэманстрацыі, пікетавання, іншага масавага мерапрыемства, здзейсненае удзельнікам такіх мерапрыемстваў, а роўна публічныя заклікі, у тым ліку з выкарыстаннем сродкаў масавай інфармацыі ці глабальнай кампутарнай сеткі Інтэрнэт, да арганізацыі або правядзення сходу, мітынгу , вулічнага шэсця, дэманстрацыі, пікетавання, іншага масавага мерапрыемства з парушэннем устаноўленага парадку іх арганізацыі або правядзення, учыненыя арганізатарам раней удзельнікам такіх мерапрыемстваў, альбо іншай асобай двойчы на працягу года пасля накладання адміністрацыйнага спагнання за такое ж парушэнне, караюцца арыштам, ці абмежаваньнем волі на тэрмін да трох гадоў, або пазбаўленнем волі на той жа тэрмін.
Таксама праект зменаў у Крымінальны кодэкс прапануе ўзмацніць жорсткасць пакарання за замах на жыццё працаўніка праваахоўнага органу, вайскоўца (артыкул 362). Такія дзеянні прапануюць караць пазбаўленнем волі на тэрмін ад 15 да 25 гадоў або пажыццёвым пазбаўленнем свабоды.
Артыкул 369 «Абраза прадстаўніка ўлады, дыскрэдытацыя органаў дзяржаўнай улады і кіравання» прапануюць выкласці ў такім выглядзе:
«Абраза прадстаўніка ўлады ў сувязі з выкананнем ім службовых абавязкаў, дыскрэдытацыя органаў дзяржаўнай улады і кіравання, учыненыя ў публічным выступе, альбо ў друкаваным ці публічна дэманстраваным творы, альбо ў сродках масавай інфармацыі, альбо ў інфармацыі, размешчанай у глабальнай кампʼютарнай сетцы Інтэрнэт, караюцца штрафам, або арыштам, ці абмежаваннем волі на тэрмін да трох гадоў са штрафам, або пазбаўленнем волі на той жа тэрмін са штрафам».
Таксама прапануюць увесці ў КК артыкул 369-1 «Дыскрэдытацыя РБ». Артыкул, у прыватнасці, гаворыць, што «распаўсюд інфармацыі ў непрыстойнай форме, якая выказвае відавочную непавагу да беларускага народу і Рэспублікі Беларусь, здзейснены ў публічным выступе, альбо ў друкаваным ці публічна дэманстраваным творы, альбо ў сродках масавай інфармацыі, альбо ў інфармацыі, размешчанай у глабальнай кампʼютарнай сетцы Інтэрнэт, караецца штрафам, або папраўчымі работамі на тэрмін да двух гадоў, або арыштам, ці абмежаваннем волі на тэрмін да двух гадоў, або пазбаўленнем волі на той жа тэрмін».
