Цёплы кастрычнік радуе беларусаў грыбным ураджаем, таму вялікая колькасць людзей у буднія і выходныя выбіраецца ў лес на «ціхае паляванне». У час, калі вы «палюеце» на грыбы, на вас палююць небяспечныя паразіты — кляшчы. Сезон нападу кляшчоў пачынаецца ў красавіку і заканчваецца ў кастрычніку-пачатку лістапада, калі восень была цёплай. Рэдакцыя budzma.org звярнулася за парадамі да адмыслоўца і дазналася што трэба рабіць, каб не стаць ахвяраю небяспечнага паразіта.
Наш суразмоўца Павел з’яўляецца старшынёй аднаго з клубаў турыстаў-паходнікаў. З 2009 года амаль кожныя выходныя ён праводзіць у лясным масіве з прадстаўнікамі свайго клуба. Не раз здаралася, што яго або сябраў таварыства кусалі розныя насекомыя падчас вандровак, самыя небяспечныя з іх — кляшчы: «Кастрычнік у гэтым годзе выдаўся даволі цёплым, таму кляшчы ўсё яшчэ актыўнічаюць, таму калі выязджаеце ў лес пагуляць ці ў грыбы, то абавязкова апранайце аднатонную светлую вопратку з доўгімі рукавамі. Адзенне павінна шчыльна прылягаць да цела. Такім чынам вы адразу ж заўважыце на сабе ці сваіх сябрах паразітаў», — кажа Павел. Ён зазначае, што галава павінна быць таксама пакрыта галаўным ўборам або капюшонам.
Што яшчэ трэба абавязкова рабіць?
Перад уваходам у лес абавязкова трэба выкарыстоўваць спецыяльныя рэпеленты для абароны ад кляшчоў.
Знаходзячыся доўга ў лесе, варта кожныя паўгадзіны аглядаць адзін аднаго, калі вы пайшлі ў лес разам з кампаніяй. Абавязкова правярайце галаву адзін аднаму, кляшчы могуць хавацца ў валасах.
Калі вы вырашылі зрабіць прывал, то перад гэтым абавязкова выбранае месца трэба ачысціць ад галля і сухой травы ў радыюсе мінімум 10 метраў, а лепш 15.
Пасля паходу ў лес вопратку трэба агледзець, каб не прынесці кляшчоў у аўтамабіль ці дамоў. Дома варта па вопратцы прайсціся гарачым прасам, а лепш і прасцей памыць у пральнай машынцы пры тэмпературы не ніжэй 60 градусаў.
Што рабіць, калі клешч усё ж прысмактаўся?
Калі вас укусіў клешч, лепш за ўсё звяртацца адразу па дапамогу да медыкаў. У выпадку, калі ідзеце ў паход на некалькі дзён, то абавязкова вазьміце з сабой ёд ці антысептык, пінцэт з шырокімі канцамі ці нітку і іголку. Даставаць кляшча трэба тэрмінова. Выдаліць паразіта з цела можна падчапіўшы яго пінцэтам ці вузялком ніткі. Зачапіце паразіта за шыйку і павольна паварочвайце яго па гадзіннікавай стрэлцы, пакуль клешч не адчэпіцца ад цела.
Пасля выдалення паразіта трэба праверыць месца ўкуса, каб там не засталося хабатка кляшча. Калі ён застаўся, то апрацуйце іголку антысептыкам і выдаліце хабаток, як стрэмку. Пасля апрацуйце месца ўкуса ёдам ці антысептыкам. Рукі варта памыць ці таксама апрацаваць антысептыкам.
Што рабіць з паразітам?
Павел зазначае, што кляшча варта памясціць у вільготны кавалачак тканіны і пакласці ў флакончык ці пачак з-пад запалак. Такім чынам клешч будзе заставацца жывым цягам двух-трох сутак. Паразіта абавязкова трэба аддаць на даследаванне і выяўленне энцыфаліту, а вам звярнуцца да лекара. Магчыма, прыйдзецца прапіць антыбіётыкі.
Якія прызнакі, што вас укусіў клешч?
Пасял ўкуса кляшча чалавек можа адчуваць агульную слабасць, млоснасць, недамаганне, галаўны боль. Магчыма павышэнне тэмпературы цела да 38 градусаў. Рэзкае павелічэнне лімфатычных вузлоў. Могуць быць болі ў цягліцах, касцях, шыі. Калі адчуваеце недамаганне пасля візіту ў лес цягам трох дзён, але на целе не выявілі кляшча, таксама абавязкова звяртайцеся да доктара, бо клешч можа прысмактацца ў самыя нечаканыя месцы вашага цела.
АМ, budzma.org
