Сёння а 14.00 на Заходніх могілках Мінска адбудзецца ўрачыстае адкрыццё помніка даследчыку сталінскага тэрору Леаніду Маракову. Выступіць кіраўніцтва ГА “Саюз беларускіх пісьменнікаў”, паэты, празаікі, грамадскія дзеячы, стваральнік помніка — скульптар Ігар Засімовіч.
У Дзень памяці ахвяр сталінскіх рэпрэсій запрашаем далучыцца да ўшанавання памяці выдатнага гісторыка Леаніда Уладзіміравіча Маракова, які адышоў у лепшы свет амаль два гады таму.
Развітанне з Леанідам Мараковым (фота)
Леанід Маракоў (1958-2016) — аўтар унікальнага энцыклапедычнага даведніка ў 10 тамах (15 кнігах) «Рэпрэсаваныя літаратары, навукоўцы, работнікі асветы, грамадскія і культурныя дзеячы Беларусі. 1794—1991», у якім прыводзяцца біяграфіі больш за 20 000 расстраляных або загінулых у сталінскіх канцлагерах дзеячаў беларускай культуры. Іншыя значныя працы апублікаваныя Мараковым: «Вынішчэнне» — кніга, прысвечаная даследаванню рэпрэсіяў супраць беларускіх літаратараў; «Ахвяры і Карнікі» — дакументальнае даследаванне лёсаў ахвяраў і іх катаў у часы масавых расстрэлаў 1930-х гг.; двухтамовы энцыклапедычны даведнік «Рэпрэсаваныя праваслаўныя свяшчэнна- і царкоўнаслужыцелі Беларусі. 1917—1967».
