2-4 сакавіка ў сталіцы Літвы пройдзе найбуйнейшы ў краінах Балтыі кірмаш вырабаў ручной працы і нацыянальнай спадчыны.
Хочаце пазнаць гісторыю старога горада, балтыйскі фальклор і спадчыну шматнацыянальнай кухні за кароткі тэрмін? Таму не прапусціце магчымасць наведаць сталіцу Літвы Вільнюс 2-4 сакавіка. У першыя выходныя вясны тут пройдзе традыцыйнае свята года – кірмаш Казюкі. Як і кожны год, наведвальнікі кірмашу змогуць паблукаць па прылаўках, якія раскінуліся на многія кіламетры, і пакаштаваць не толькі літоўскую, але і польскую, латышскую, беларускую, татарскую кулінарную спадчыну, а таксама кулінарную спадчыну іншых народаў, якія пражываюць у сталіцы і ў ваколіцах Літвы.
Традыцыя XVII стагоддзя
Кірмаш Казюкі – гэта не толькі самы вялікі, але і самы стары фестываль у Вільні, які сыходзіць у XVII стагоддзе. Традыцыйна ён праводзіцца ў выходныя, бліжэйшыя да дня Св. Казіміра, які адзначаецца 4 сакавіка. Месца святкавання – прылаўкі даўжынёй амаль два дзясяткі кіламетраў, размешчаныя ў старым горадзе Вільні, які мае статус спадчыны ЮНЕСКА, ці побач з ім, дзе выстройваюцца сотні рамесных прылаўкаў і палатак.
Свята, прысвечанае святому заступніку Літвы Казіміру (1458-1484), стала вясёлай сустрэчай вясны. У той жа час гэта і фестываль, які аб’ядноўвае старыя рамесныя традыцыі і сучасны падыход да спадчыны ў самым сэрцы Вільні.
Унікальны досвед
Калісьці на кірмашы Казюкі ў яўрэяў можна было купіць прысмакі, у туркаў – хусткі, у рускіх – шкло і сукно. Зараз тут можна знайсці амаль усё, што толькі вырабляюць найлепшыя літоўскія, латышскія, эстонскія, польскія і беларускія майстры па дрэве, у кераміцы, кулінарыі і іншых галінах.
Кірмаш Казюкі прапануе наведвальнікам вялікі досвед: утульны дух кірмашу, магчымасць пагутарыць з артыстычнымі майстрамі ручной працы і прыязнымі гандлярамі. Яны прапануюць узоры мясцовых тэхналогій, якія прайшлі выпрабаванне часам, – вязаныя, разьбяныя, вылепленыя рэчы, створаныя ў кузні або ювелірных майстэрнях.
Адны наведвальнікі прыносяць з кірмашу гаспадарчыя рэчы, другія – ювелірныя вырабы ручной працы, сустракаюцца з сябрамі за келіхам квасу або тут, ля прылаўка, на адкрытым паветры, спрабуюць прапанаваны кулінарам прадукт. Іншых зачароўвае разнастайнасць вырабленых паводле мясцовых традыцый або сучасных страў, вынаходліва прыгатаваных прысмакаў – салодкіх гасцінцаў для дзяцей.
Прыцягвае ўсё больш наведвальнікаў
Віленскія Казюкі з’яўляюцца найбуйнейшым у Вільні кірмашом майстроў вырабаў ручной працы з усёй краіны, што прыцягвае сотні тысяч удзельнікаў. Прывабленыя новымі ўражаннямі або адданыя кірмашу наведвальнікі прыязджаюць не толькі з Літвы, але і з суседніх краін. Іх прыцягвае асаблівы дух кірмашу, аўтэнтычнасць свята.
Некалькі гадоў назад колькасць наведвальнікаў кірмашу Казюкі перавысіла паўмільёна і з кожным годам усё расце. Мерапрыемства суправаджаецца забаўляльнай музыкай, а працы майстроў старых рамёстваў на кірмашы дапаўняюцца працамі маладых дызайнераў і ювеліраў краіны.
Кірмаш Казюкі – гэта свята, якое вылучаецца з мноства іншых падобных мерапрыемстваў у краінах Балтыі сваім размахам, унікальнасць якога ствараюць шэраг традыцый:
- Вербы Віленскага краю. Гэта рознакаляровыя, не ўласцівыя ніякай іншай культуры плеценыя букеты з сушаных раслін. Вербы, якія сыходзяць у часы шанавання Св. Казіміра, – адзін з галоўных сувеніраў, без якога не вяртаецца ні адзін наведвальнік кірмашу.
- Абаранкі і пернікі ў форме сэрца. Заварныя абаранкі і пернікі кірмашу Казюкі – яшчэ адна вельмі даўняя традыцыя. Калісьці такія пернікі былі асаблівым знакам увагі каханым і нарачоным. Менш “сур’ёзны” ядомы сувенір – вязанка абаранкаў, абвешаных імі гасцей кірмашу ўсе пазнаюць на адлегласці.
- Шматнацыянальная кулінарная спадчына. На кірмашы надаецца ўвага не толькі сувенірам і вырабам майстроў старых рамёстваў, але і прадстаўнікам нацыянальнай кулінарнай спадчыны. З самага пачатку і да канца кірмашу наведвальнікаў суправаджаюць водары традыцыйных страў літоўскай кухні, на кірмашы можна паспытаць кібінай, прыгатаваныя па традыцыях караімаў, і татарскі шымталапіс, які нагадвае салодкі мастацкі твор.
- Майстэрні майстроў. Казюкі – гэта свята, падчас якога можна не толькі купіць арыгінальны плецены, драўляны, гліняны, жалезны прадмет хатняга ўжытку або аздабленне, але і даведацца, як яно робіцца. Майстры кірмашу ахвотна паказваюць наведвальнікам, як нараджаюцца іх творы, а самыя цікаўныя могуць сваімі рукамі выкаваць нават спецыяльную манету.
- Рэкорды. Гэта яшчэ адно выяўленне творчасці майстроў кірмашу, які надае святу весялосць. За гісторыю свята зафіксаваны рэкорды самай вялікай вярбы, самай вялікай курынай стравы цюлпе, самай вялікай драўлянай лыжкі і пары драўляных чаравікаў.