Пра выхад кнігі напісаў Ігар Случак на сваёй старонцы ў Фэйсбук.
«Выйшла мая кніга, ідэя якой нарадзілася даўно, але была паспяхова рэалізаваная толькі ў 2022 годзе.
Кніга, створаная ў асноўным на падставе маёй шматгадовай практыкі па абароне моўных правоў беларускамоўных беларусаў, афіцыйнай пераспіскі, што налічвае тысячы, а можа ўжо і дзясяткі тысяч лістоў, маёй дыпломнай і магістарскай работы, якія вызначылі месца беларускай мовы ў Беларусі і стан беларускай дзяржаўнай моўнай палітыкі».
Аўтар кнігі адзначае, што «вялікую частку кнігі складаюць цікавыя факты, атрыманыя з перапіскі з дзяржаўнымі і прыватнымі ўстановамі, дэпутатамі, чыноўнікамі, а таксама статыстыка, частку з якой нельга атрымаць анідзе больш, акрамя гэтай кнігі».
Кніга складаецца з трох частак.
«У першай частцы кнігі гаворка вядзецца аб агульным разуменні дзяржаўнай моўнай палітыкі і яе відах, аб шматмоўі ў межах адной краіны і барацьбе моў паміж сабой, іх уздыме і заняпадзе, адраджэнні і знікненні <...>».
У другой частцы кнігі аўтар прыводзіць прыклады «некаторых шматмоўных краін, дзе паказана цывілізаванае суіснаванне двух і больш дзяржаўных моў, праблемы, што ўзнікаюць у такіх дзяржавах і метады іх вырашэння, а таксама заканадаўства, што абараняе правы носьбіта той ці іншай дзяржаўнай мовы <...>».
Трэцяя частка кнігі распавядае «пра часы дзяржаўнасці і заняпаду беларускай мовы ад Х стагоддзя да сённяшняга часу. Асаблівая ўвага надаецца перыяду ад 1996 года, калі беларуская мова патрапіла зноў у неспрыяльныя ўмовы. Напрыклад, у 1646 годзе расійскія паслы адмаўляліся весці дыпламатычную перапіску з Польшчай па-польску, бо здаўна павялося, што яна вядзецца па-беларуску, або тое, што ў 2021 годзе толькі 1,4% беларускіх прававых актаў былі на беларускай мове».
Таксама Ігар Случак адзначае, што выхад дадзенай кнігі «навукова даказвае, што сёння ў Беларусі на дзяржаўным узроўні, у першую чаргу праз недасканалае моўнае заканадаўства, створаны ўмовы для дыскрымінацыі беларускамоўных беларусаў па моўнай прыкмеце <...>. Мова — гэта адзінае, што безумоўна адрознівае адзін народ ад іншага. Мова стварае і ўмацоўвае дзяржаўнасць. Мова гуртуе і ўмацоўвае народ. <...> Таму варта памятаць, што пакуль жыве беларуская мова — будзе і Беларусь».
Замовіць кнігу можна, напісаўшы Ігару Случаку ў Фэйсбук.