Каманда SYMPA просіць аб салідарнасці і лічыць, што арышт Таццяны Кузінай з’яўляецца яшчэ адной праявай пераследу і ціску на свабоду думкі і свабоду слова ў Беларусі.

Арышт Таццяны стаў нечаканым і шакавальным развіццём рэпрэсіўнай палітыкі беларускіх уладаў, якія распачалі грубы напад на прадстаўнікоў беларускай даследчай і экспертнай супольнасці. Усяго за некалькі дзён да затрымання Таццяны вядомы беларускі палітычны аналітык Арцём Шрайбман быў вымушаны пакінуць краіну з-за пагрозы арышту. Такая ж сітуацыя ў эканаміста Сяргея Чалага, які зараз знаходзіцца ва Украіне. 30 чэрвеня без усялякіх на тое падстаў была затрыманая іншая вядомая беларуская экспертка ў сферы ўнутранай і знешняй палітыкі Беларусі Валерыя Касцюгова, якая ўзначальвае праект «Наша думка».

SYMPA просіць выказваць салідарнасць з Таццянай Кузінай і беларускай экспертнай супольнасцю любым з магчымых спосабаў, напрыклад:

1. Як мага шырэй распаўсюдзіць інфармацыю пра справу Таццяны;
   
2. Накіраваць беларускім уладам ліст пратэсту супраць затрымання Таццяны Кузінай і бесперапынных рэпрэсій у дачыненні да беларускай грамадзянскай супольнасці;
   
3. Накіраваць адкрыты ліст падтрымкі Таццяне і іншым даследчыкам, якія церпяць пераслед у Беларусі;
   
4. Падзяліцца відэапаведамленнем, адрасаваным Таццяне і яе сям’і;
   
5. Прыняць удзел у любой іншай акцыі салідарнасці з Таццянай Кузінай і беларускай экспертнай супольнасцю.