Алесь Тодараў на budzma.org разбіраецца з тым, як адмовіцца ад негатыўнага мыслення, навучыцца кантраляваць свае думкі і скіроўваць іх у правільным напрамку.
Крыніца: flytothesky.ru
Розум — гэта ўяўны сад
У сітуацыі, калі мозг перагружаны негатыўнай інфармацыяй, лепшае, што можна зрабіць — гэта сабрацца і перастаць панікаваць. А яшчэ лепш — працягваць рабіць свае штодзённыя справы.
Кожны дзень мы аказваемся пад ціскам малапрыемнай інфармацыі. Чытаючы самыя розныя інфармацыйныя крыніцы, часам даволі супярэчлівыя, ужо і не ведаеш часам каму верыць і што будзе далей. І гэта не можа не выклікаць пачуцця трывогі. У такой сітуацыі без вялікай на тое патрэбы, лепей не занурацца глыбока ў негатыў, каб гэта потым не вылілася ў праблемы псіхалагічнага характару.
Рэч у тым, што мы самі здольныя выбіраць, што пасеяць у сваёй галаве. Бо наш розум — гэта, як той сад. І ён відавочна загіне, калі ў ім будуць знаходзіцца адно негатыўныя думкі, трывогі і перажыванні. Бо сад з пустазеллем — відовішча даволі сумнае. Нават калі няма сілаў і асаблівага жадання, трэба ўсё адно імкнуцца шукаць хаця б нейкі пазітыў, шчасце і каханне. Каб у тым уяўным садзе было чаму квітнець.
Чытайце яшчэ: Адкуль бяруцца змрочныя думкі і што рабіць, каб іх адагнаць?
Падвышаем самаацэнку
Крыніца: burninghut.ru
Самі таго не заўважаючы мы часта вядзем унутраны дыялог, дзе ўжо пераважае негатыў: «У мяне нічога не атрымаецца», «Я непрыгожы», «Я надта лянівы», «Усё, што я раблю, нікому не патрэбнае і не мае ніякага сэнсу». Думкі падобнага характару моцна ўплываюць на нашае стаўленне да саміх сябе і з’яўляюцца ўрадлівай глебай для негатыву звонку.
Каб пераадолець такі вобраз мыслення, трэба пазбавіцца таго бязладдзя, што пануе ў галаве. Першае, што варта зрабіць — спарадкаваць думкі. Гэта дапаможа матэрыялізаваць свае жаданні і зрабіць іх рэалістычнымі. Напрыклад, задумайцеся аб тым, чым вы можаце выдзяляцца на фоне іншых, што ў вас ёсць такога незвычайнага.
Можна нават паспрабаваць такое практыкаванне, каб пазбавіцца ўнутранага негатыву: выпішыце на аркушы паперы ўсе песімістычныя ўстаноўкі, што маеце, і замяніце іх пазітыўнымі.
Замест «У мяне нічога не атрымаецца» — «Я шмат чаго ўмею, а што не ўмею, то пры жаданні змагу вывучыць і засвоіць». Замест «Я занадта лянівы» — «Я дамогся таго, што ў мяне ёсць, а гэта ўжо нямала». Замест «Я непрыгожы» — «Я падабаюся многім». Замест «Усё не мае сэнсу» — «Гэта патрэбна найперш мне самому».
Калі рэгулярна рабіць такую «рэвізію» і шукаць у сваёй асобе пазітыў і моцныя бакі, то з часам негатыўныя думкі пачнуць знікаць самі па сабе. А вашая самаацэнка гарантавана падвысіцца.
Вучымся на сваіх памылках
Крыніца: www.georgiatimes.info
Само па сабе веданне ўласных памылак, якія былі некалі дапушчаны, не нясе нейкай карысці. Хутчэй нават наадварот — многія людзі могуць гадамі жыць у скрусе, абдумваючы сітуацыі, што перажылі ў мінулым і якім не далі рады.
Але калі паставіцца да прамінулага троху іначай, можна атрымаць з яго нейкі плён. Бо, каб паспяхова рухацца наперад, трэба аналізаваць у тым ліку і свае няўдачы. Разумець, што раней было зроблена няправільна і чаму ўсё атрымалася менавіта так. У такім ключы негатыў варта ўспрымаць найперш як каштоўны жыццёвы досвед, а не як магчымы трыгер для перажыванняў.
Часцей згадвайце свае тыповыя памылкі і пралікі, але не каб гараваць і бедаваць, а каб болей іх не рабіць. Напрыклад, у вас не атрымліваецца рухацца наперад наўпрост таму, што вы зрабілі памылку недзе на папярэднім этапе? А можа быць, вы прапусцілі нейкі ключавы момант у самым пачатку, і зараз уся складаная канструкцыя, збудаваная вамі, хістаецца менавіта праз гэта?
Аналізуйце, разважайце і выпраўляйце. Як казаў наш класік Уладзімір Караткевіч, «позна бывае толькі ў труне».
5 рэчаў якія дакладна не варта рабіць:
Крыніца: knigikratko.ru
1. Казаць і думаць пра сябе ў негатыўным ключы. Мы, тое, што мы самі пра сябе думаем. Калі вас нешта не задавальняе — мяняйцеся, паляпшайце сябе і сваё жыццё. Гэта самая простая ісціна.
2. Быць занураным у мінулае. Добра вяртацца да таго, што некалі абылося, зрэдчас, але жыць прамінулым — абсалютна безсэнсоўны занятак. Вы — тут і цяпер. Трэба займацца арганізацыяй свайго цяперашняга жыцця, а не спрабаваць выправіць ранейшыя памылкі.
3. Пераймацца тым, што вы не ў стане кантраляваць і што ад вас ніякім чынам не залежыць.
4. Адмаўляцца ад сваёй мары. Ніхто і ніколі не скажа вам «дзякуй» за тое, што вы вырашылі ахвяраваць сваім жыццём у імя кагосьці. Гаворка, вядома, не пра нейкі гераічны ўчынак у трагічнай сітуацыі, а пра звычайнае жыццё. Скажам, калі хатняя гаспадыня будзе дакараць, што не стала выбітнай акторкай ці спявачнай. Або мужчына наракаць, што не стаў вядомым банкірам. Такія «ахвяры» наўрадці будуць кімсьці заўважаныя і зразумелыя, нават самымі блізкімі. Таму лепей выбіраць сябе.
5. Мець зносіны з людзьмі, якія вас увесь час крытыкуюць і дэматывуюць. Банальна не варта камунікаваць з таксічнымі асобамі, якія не могуць не тое што падтрымаць, але быць хаця б нейтральнымі да вашага жыццёвага выбару.
Алесь Тодараў, budzma.org
