Алесь Тодараў разбіраецца на budzma.org з тым, што такое харызма і ці можа быць харызматычным абсалютна кожны чалавек.
Ёсць людзі, якія валодаюць асаблівым магнетызмам. Яны здольныя прыцягваць, пераконваць і весці навакольных за сабой. Пэўна, кожны з такімі сутыкаўся на сваім жыццёвым шляху. Такіх людзей называюць харызматычнымі.
Многія лічаць, што харызма — гэта прыродная якасць, якая даецца ад нараджэння. Але гэта не зусім так. Бо па вялікім разунку стаць харызматычным чалавекам можа кожны. Для гэтага неабходна развіць у сабе пэўныя навыкі.
У чым выяўляецца харызма?
— Упэўненасць у сабе
У такіх людзей здаровая самаацэнка без перакосаў у агрэсію і лішнюю саступлівасць. Яны ведаюць, чаго хочуць і як гэтага дабіцца.
— Высокі эмацыйны інтэлект
Гэта значыць, яны ўмеюць кіраваць сваімі эмоцыямі і пры гэтым з разуменнем ставяцца да навакольных.
— Камунікабельнасць
Харызматычны чалавек неабавязкова з’яўляецца «душой кампаніі», але сапраўды добра валодае камунікатыўнымі навыкамі і можа лёгка знайсці падыход да суразмоўцы, каб пераканаць яго.
Як развіць уласную харызму?
Фармаванне харызмы — гэта досыць працяглы і цяжкі працэс, які пабудаваны на індывідуальных асаблівасцях кожнага асобна ўзятага чалавека. Разам з тым ёсць некалькі простых парад, якія абавязкова дапамогуць у гэтай справе.
Першае з чаго варта пачаць — гэта імкнуцца быць больш пазітыўным і жыццярадасным чалавекам. Людзі не надта сімпатызуюць вечна змрочным і песімістычна настроеным асобам. Нягледзячы на свой сапраўдны эмацыйны стан, варта імкнуцца рабіць ўсё з усмешкай і добрым настроем.
Пастарайцеся быць упэўненым ва ўсiх сваiх учынках. Нават калі недзе ў глыбіні душы вы сумняваецеся, не паказвайце гэтага вонкі. Людзям падабаюцца ўпэўненыя ў сабе асобы, гэта стварае пэўны арэол цвёрдасці, рашучасці і мудрасці.
Не саромейцеся быць настойлівым, але разам з тым не будзьце агрэсіўным чалавекам. Настойлівасць сведчыць аб тым, што чалавек ведае сабе цану, і гэта падабаецца іншым людзям.
Навучыцеся слухаць іншых людзей. Імкніцеся прыслухоўвацца да таго, што менавіта хвалюе чалавека пры размове. Парою гэта можа дапамагчы заваяваць яго давер і сімпатыю.
Імкніцеся не надта выхваляцца сваімі дасягненнямі і не праяўляйце лішні эгаізм. Нарцысы і эгаісты не вельмі падабаюцца людзям. Лепшы варыянт — быць на ўзроўні «крыху вышэй сярэдняга». Так людзі будуць разумець, што адначасова вы і нібыта «свой», але разам з тым крыху наперадзе іх.
Калі вы пачынаеце нейкую справу, то рабіце яе з ўсім магчымым запалам, цалкам аддаючыся ёй. Падобныя праявы будуць натхняць людзей і гарантавана стануць дадатковай матывацыяй.
Імкніцеся быць максімальна адкрытым чалавекам. Многія людзі здольныя распазнаваць хлусню. Лепш прамаўчаць аб чым-небудзь, чым проста тупа хлусіць. Калі ў нечым не разбіраецеся або дакладна не маеце рацыі, лепш не ўступайце ў спрэчкі, каб не падрываць свой аўтарытэт.
Не будзьце скнарам, бо людзі звычайна не вельмі любяць сквапных. Але гэта не азначае, што варта ставіцца да фінансавых пытанняў абыякава. Навакольныя павінны разумець, што вам не шкада грошай на патрэбныя рэчы, але разам з гэтым, вы не схільныя іх распускаць на неабавязковыя рэчы.
Гумар часта з’яўляецца складовай часткай харызмы. Своечасова сказаны добры жарт здольны значна павысіць меркаванне аб чалавеку ў кампаніі ў лепшы бок.
З чаго пачаць у развіцці харызмы?
Праяўляйце больш ініцыятывы
Калі вы можаце зрабіць самі — рабіце. Аптымізм і пачуццё ўласнай незаменнасці прыцягваюць і, як правіла, людзі заўсёды ўпэўненыя ў такім чалавеку, імкнуцца быць з ім побач і мець нейкую агульную справу. У цяжкі момант на такіх разлічваюць у першую чаргу.
Працуйце над сваім вобразам
Навучыцеся лагічна і лаканічна фармуляваць сваі думкі і даносіць іх да іншых людзей. Гэта вельмі важна, бо, калі вы хочаце быць харызматычным, менавіта вы павінны зараджаць людзей сваімі ідэямі. Выкарыстоўвайце міміку, жэстыкуляцыю, выпрацуйце свой арыгінальны тып паводзін.
Будзьце натуральным
Уся сіла і энергія павінна ісці знутры, быць сапраўднай, а не выдуманай. Шчырасць і душэўнасць высока цэніцца асабліва ў моцных асобах, бо менавіта добразычлівасць і адкрытасць адрознівае іх ад упартых і самаўпэўненых зануд.
І самае галоўнае — заўсёды заставайцеся самім сабой!
Алесь Тодараў, budzma.org
