Удзельнікі тэатральнай студыі «Купалінка» ў Варшаве зладзілі народныя чытанні вершаў У. Караткевіча «Чалавек носіць сваё неба з сабой». Сярод гасцей былі айцец Вячаслаў Барок, драматург Сяргей Кавалёў, артысты Зьміцер Бартосік, Алесь Дзянісаў, Андрусь Такінданг і Аляксандр Ждановіч.

Прагучала больш за 15 вершаў і некалькі песень У. Караткевіча, таксама прысутныя паглядзелі разам унікальныя кадры хронікі з 50-годздзя пісьменніка. Адметна, што ўсе вершы для чытання ўдзельнікі абіралі самі.

«Мы прывыклі казаць „Караткевіч — глыба, тытан, нацыястваральнік“. Гэта самае простае. Значна цяжэй усвядоміць сабе, што і на нас гісторыя наклала свой абавязак — як мінімум усвядоміць сабе, што для наступных пакаленняў беларусаў, асабліва для тых, хто дарастае ў эміграцыі, гэтыя словы, як і самыя імёны вялікіх беларусаў, могуць стаць пустым гукам. Гісторыя дыктуе і нам свае ўмовы, як калісьці Караткевічу і ягоным персанажам. І ў гэтай гісторыі цяпер ужо мы мусім прыкласці ўсе свае сілы, усе намаганні, стаць тытанамі, каб нашыя дзеці не згубіліся на пярэстай мапе Еўропы.

Купалінка, якая гуртуе беларусаў ад 3 да 60+, увесь навучальны год 2024-2025 прысвяціла творчасці і асобе Караткевіча, — распавяла стваральніца студыі „Купалінка“ Вольга. — Мы ставілі ягоныя казкі на арт-летніках, чыталі вершы і прозу на занятках, разважалі на сустрэчах і ў дыскусіях пра ролю асобы ў гісторыі. І страшэнна ўсцешаныя плёнам: калі надышоў час адзначаць юбілей, нашыя ўдзельнікі самі вырашылі зладзіць вечарыну чытання вершаў Караткевіча. І да іх далучыліся іншыя варшавяне. 

Караткевіч стаў насамрэч народным. Гэта самае важнае — змагчы, здолець якасна перадаць далей дух Караткевіча, а заадно — дух нацыі, падзяліцца той прыгажосцю, той годнасцю, той веліччу, якая так патрэбна кожнаму чалавеку, каб рэалізаваць сваё натуральнае права: прыналежаць».

Чытанне вершаў Караткевіча, арганізаванае студыяй "Купалінка"

Budzma.org

Фотаздымкі прадастаўлены студыяй «Купалінка»