Міністр адукацыі Андрэй Іванец у размове з sb.by заявіў, што наступны год будзе трансфармацыйны для школаў. Рэдакцыя Budzma.org азнаёмілася з размовай і склала спіс галоўных зменаў, якія могуць адбыцца ў школьнай адукацыі ўжо ў наступным годзе.
З новага навучальнага года ў беларускіх школах і гімназіях хочуць увесці адзіную абавязковую школьную форму.
Абмежаваць карэстанне мабільнымі тэлефонамі — іх прыйдзецца пакідаць у спецыяльна абсталяваных месцах.
У школах і гімназіях будуць выконваць гімн і падымаць сцяг у дні дзяржаўных святаў, а таксама перад пачаткам і ў канцы кожнай чвэрці.
Уводзяць тэматычныя суботы або шосты школьны дзень па тэмах грамадзянскае і патрыятычнае, духоўна-маральнае выхаванне, прапаганда здаровага ладу жыцця, працоўнае выхаванне і прафесійная арыентацыя.
Сумесна з МУС будзе распрацавана праграма навучання для ваенна-патрыятычных клубаў і класаў — для іх навучэнцаў будуць уведзены ільготы на паступленне без экзаменаў у спецыялізаваныя ўстановы — кадэцкія вучылішчы, ліцэі МУС, МНС, Сувораўскае вучылішча.
Плануецца ўзмацніць падрыхтоўку дзяцей, якія навучаюцца ў педагагічных класах. Яны будуць паступаць ва ўстановы вышэйшай адукацыі з 2023 года па мэтавым кірунку без экзаменаў.
Валодаць аўтарскімі правамі на ўсе новыя падручнікі цяпер будзе заказчык — дзяржава ў асобе Нацыянальнага інстытута адукацыі.
Правядуць праверку падручнікаў. Апрабацыю новых падручнікаў будуць замацоўваць не па ўсёй краіне, як гэта адбываецца цяпер, а рабіць эксперыментальную групу ў канкрэтных школах, каб поўны наклад з’яўляўся толькі пасля апрабацыі.
АМ, budzma.org
