Марылі пакаштаваць страву са стала князя ВКЛ? Мы падзелімся з вамі рэцэптам! Зразы завіўныя падавалі за часамі Ягайлы, а можа, і раней. Ведаючы рэцэпт, вы зможаце пачаставаць сваіх блізкіх ледзь не каралеўскай пышнай стравай.
Ягайлаў сняданак
Гісторыкі сцвярджаюць, што зразы пачалі гатаваць яшчэ ў XIV стагоддзі, у часы князя Ягайлы. Гэта была ўлюбёная страва князя, і еў ён іх, як не дзіва, на сняданак! Пазней, у Вялікім Княстве Літоўскім, зразы сталі падаваць да шляхецкага стала на ранак. Шляхта вельмі любіла пераймаць стравы і традыцыі князёў. Але есці такую страву лепш на абед, на сняданак рэкамендуем амлеты ці кашы.
Зразы пачалі падаваць на велікодны сняданак. Яны смачныя нават халодныя, нагадваюць хатнюю каўбасу, таму іх асвячалі ў храме на свята, а потым дзяліліся імі паміж сваякоў. Гатавалі зразы і падчас палявання са свежаніны з грыбамі ці капустаю.
Зразы вельмі любіла каралева Бона Сфорца, ёсць сведчанні, што падобную страву гатавалі і ў Італіі, адкуль каралева Бона была родам.
Начыняць зразы можна чым заўгодна: фаршам, салам, грыбамі, капустаю, зелянінаю, бульбяной кашай ці нават сырам. Зразы могуць быць не толькі завіўныя, але і сечаныя, падобныя да звычайнай катлеты, але з начыненнем. Тыя ж галубцы — своеасаблівыя зразы, толькі замест мясной абалонкі — капусны ліст. У XIX стагоддзі нашыя продкі праявілі кулінарную снароўку і пачалі рабіць зразы з бульбы, дадаючы ўнутр грыбы, цыбулю ці мяса. Такі варыянт стравы вельмі смачны, асабліва са смятанай, але ў нас рэцэпт зразаў, як на стале ў князя Ягайлы.
Як прыгатаваць завіўныя зразы?
Мяккую ялавічыну нарэзаць папярок валокнаў не вельмі тонкія лустачкі, адбіць іх малатком, пасаліць і паперчыць. Для начынення спатрэбіцца свіны фарш. Для запраўкі фаршу дробна пасячы цыбулю і абсмажыць на алеі да залацістага колеру. Сам фарш прыправіць, дадаць астыглую смажаную цыбулю, жаўток і лыжку смятаны. Перамяшаць да аднароднай масы.
На адбіты кавалак ялавічыны пакласці начыненне, згарнуць у рулет і завязаць атрыманы рулет у некалькіх месцах кулінарнай ніткай. Нітку спачатку лепш патрымаць у гарачай вадзе для зручнасці.
Зразы абсмажыць на разагрэтым алеі з абодвух бакоў. Потым рулеты перакласці ў посуд для запякання. Паліць іх вяршкамі, дадаць чорнага перцу гарошкам, крыху гваздзікі, шчопаць кмену, некалькі лаўровых лісткоў, памяшаць і пакінуць запякацца пры 180 градусах у духоўцы на 20 хвілін. Праз 10 хвілін парэзаць часнок і ўкінуць яго ў вяршковы соус. Страву падаваць пасыпанай пятрушкай — яна надасць зразам адмысловы водар і смак.
